Diamars mainta cu un ora di retraso a inicia e reunion di Parlamento riba e tema di Rijkswet Aruba Financieel Toezicht (RAft). Den e
reunion aki Prome Minister mr. Evelyn Wever Croes a acudi pa simplemente duna informacion di contenido di e ley aki, aunke cu esaki
ta algo cu e Parlamentarionan mes por lesa den e concepto cu tin.
Fraccion di MAS tabata den sala y Aquanette Gunn, un di e miembronan di e fraccion a duna un declaracion unda cu el a splica pa tur hende
sa cu fraccion di MAS no ta contra un Raft. Pero mester a traha un proposicion di nan banda pa un Raft adapta. MAS kier a bini cu cambionan cu ta mas beneficioso pa Aruba. E idea tras di RAft cu ta bini un tipo di control riba gastamento di placa di
pueblo, ta algo bon pa di e forma aki pone un fin na malgastamento di placa.
![](https://24ora.com/wp-content/uploads/2023/08/20230822_135337.jpg)
“No por bira cara cu durante añanan 90 bin ariba Gobierno ta haci inversionnan di un forma iresponsabel, hincando pueblo di Aruba den un
situacion dificil. E unico fuente di entrada cu Gobierno tin ta impuesto. Ta hopi palpabel e situacion unda pueblo ta sufriendo. Aunke
hopi colega Parlamentario ta tuma esaki manera un cherche of burla, mi ta kere cu nan ta cana den pueblo pa sa e dolor cu nan ta biba aden.
Bo tin un pueblo cu no ta biba un bida digno, pero ta sobreviviendo.”
Pa motibo di e ariba menciona, e supervision den bachi di Raft tin varios aspecto cu ningun Gobierno, ni esnan di futuro, no por haci y
deshaci cu fondo publico. Nan mester basa nan mes riba prioridad y necesidad di e pueblo di Aruba. Te aki e declaracion di e
Parlamentario Aquanette Gunn. Raft ta e organo di supervision cu Hulanda a exigi pa por refinancia e debe di Aruba, cual lo haya cu un porcentahe mas atractivo cu riba mercado mundial. De lo contrario Hulanda ta exigi pago di e prestamo den forma lihe, cual Aruba no por cumpli cu ne.
![](https://24ora.com/wp-content/uploads/2023/08/20230822_131505.jpg)
![](https://24ora.com/wp-content/uploads/2023/08/20230822_135313.jpg)