Parlamentario Alvin Molina tabatin e honor pa presencia ceremonia di graduacion di IBERO American High School na San Nicolas.
Un anochi hopi special unda cu 40 graduado a ricibi nan diploma. E studiantenan aki a traha hopi duro pa finalisa nan estudio exitosamente y nan logro ta resultado di nan esfuerso, dedicacion y perseverancia. Durante e ceremonia oficial, ei tabatin e oportunidad pa hiba palabra unda cu den nomber di Minister di Enseñansa y Deporte Endy Croes, el a felicita e graduadonan pa nan logro. Esaki sigur ta marca e comienso pa mas exito. Molina ta curasha e alumnonan pa sigui studia, sigui siña y desaroya nan mes pa asina nan por logra nan meta y den futuro por contribui na desaroyo di nos pais.
Ta tarea di Gobierno di Aruba pa inverti den enseñansa y crea plataforma unda ta brinda oportunidad na tur ciudadano pa por educa y desaroya nan mes. Y como parlamentario ta su deber pa controla si esaki ta wordo haci debidamente, Molina a sigui bisa. Despues di un dushi cena e tabatin e honor pa otorga diploma na e 40 graduadonan.
Na final di e ceremonia a reconoce e miho graduado di IBERO American High School Jean Clarie Rob. Por ultimo, parlamentario Molina ta felicita e graduadonan. Alabes, e ta gradici director Andy Centeno, staf, mentor, docente- y mayornan cu a contribui den e logro di e graduadonan.
E ta desea tur graduado hopi exito den e siguiente etapa di nan estudio. Masha pabien klas di 2023!