Den Juan Capitulo 10 vers 17+18 Hesus ta bisa : Pa e motibo aki e Tata ta stima Mi, pasobra Mi ta duna Mi bida pa Mi bolbe tume .
Ningun hende no ta kite for di Mi. Ma di Mi mes mi ta entrege. Mi tin autoridad pa dune y Mi tin autoridad pa bolbe tume , e mandamento aki mi a ricibie di Mi Tata.
Juan capitulo 3 vers 36 ta bisa; Esun cu kere den e Yiu tin bida eterno, ma esun cu no obedece e yiu ,lo no mira bida, ma e furia di Dios ta keda riba dje. Dios ta spierta nos, pasobra Dios ta stima nos, E ta hala nos atencion, pa tuma nos relacion cune na serio y biba segun Su palabra y segun Su boluntad.
E ta spierta nos pa no haci cherche, no haci bofon, no cuestiona su palabra, ni tampoco pidi prueba di su existencia, pasobra tur cos ta para cla scirbi y aunke tempo a bira trabahoso pa nos no imita esnan cu ta biba manera den 2 Timoteo capitulo 3 vers 1-9, pa nos keda firme den Su Palabra, y perservera te na Su binida. 2 Corintionan 5 vers 15 ta bisa: Y E a muri pa tur, pa esnan cu ta biba no biba mas pa nan mes,ma pa Esun cu a muri, y a resusita pa nan motibo.
Den Juan capitulo 3 vers 3 Hesus ta bisa Nicodemo: Di berdad, di berdad mi ta bisabo, si un hende no nace di nobo e no por mira e reino di Dios, y den Juan capitulo 3 vers 16 te cu 21 Hesus ta splica e cambio cu mester tuma lugar den bida di tur ser humano, pasobra Hesus a muri pa nos tur. Salbacion ta pa tur esnan cu ta kere den Cristo Hesus, y tur hende tin e mesun oportunidad, pasobra serca Dios no tin acepcion di persona.
![](https://24ora.com/wp-content/uploads/2022/04/Untitled-design-39.png)
Ora Cristo bini bin busca su pueblo, bo no por culpa ningun hende cu ta nan falta cu bo no ta bay cu Señor pasobra bo tin boluntad propio y liber escogencia pa bo dicidi durante cu bo ta na bida ken bo ta kere den dje, sea bo ta sirbi Dios of bo ta sirbi diabel. Asina e asunto ta di berdad y no tin cambio. Mientras tanto bo ta na bida bo tin tur oportunidad di arepenti, aparta di pica, biba pa Señor, y si bo muri , bo ta muri den Cristo, y Cristo a priminti den 1 Thesalonisensenan capitulo 4 cuminsando for di vers 13-18 cu e mortonan den Cristo lo lanta prome.
Dios no ta discrimina ningun hende, E a bisa bini serca Mi tur cu ta cansa y carga.( Mateo 11: 28) Un hende por ta den crimen, droga,of den perversion of e pashon di mas baho cu por tin , si e persona arepenti , Dios ta fiel y husto di pordona 1 Juan 1 vers 9. Dios no tin distincion di persona. E enemigo ta purba di tur forma pa gaña hende y mantene nan den su gara, pa asina nan aleha y rechasa Dios y bay fierno, pasobra ora un hende muri tin dos caminda cu e por bay sea cielo of fierno ( Lucas capitulo 16 vers 19-31).
E palabra di Dios ta spierta nos hopi cla cu den e ultimo tempo hende no kier scucha e berdad cu por salba nan alma. Pastor Marcel Balootje.