Diadomingo anochi alrededor di 10:10 pm a sosode un accidente di brommer na Sero Janchi. Ta trata di un Bajaj color geel numera MFA-786. Un rato prome, e motociclista a bay yena e taira dilanti y den e proceso, accidentalmente a spuit WD40 den su wowo. E ta uza e likido lubricante pa haya sa unda e leak ta den e taira. Posteriormente, e wowo tabata pica asina hopi, cu el a para band’i caminda un rato pa grawat’e. Testigonan ta indica cu te hasta el a pasa botica pa busca “Clear Eyes”, pero no a logra haya.
E tabata coriendo hunto cu un otro motociclista, pero el a tuma e bocht mucho grandi y bay dal frontal den un auto staciona band’i caminda. E auto cu el a accidenta contra di dje ta un Mini Cooper. Mesora a bati alarma na polis y ambulance.
E motociclista tabata seriamente herida, e corta na su rudia banda links tabata hopi profundo. Por a hasta nota con un pida cuero tabata colga. Un total di dos unidad di ambulance a presenta na sitio pa brinda e hoben aki atencion medico. E tabata keha di hopi dolor, na final a transport’e pa hospital caminda e lo ricibi atencion medico avansa. Polis di trafico a presenta pa documenta e accidente aki.