Studiantenan cu tin sintoma na yegada na Hulanda y/of resulta di ta COVID positivo tin cu bay den cuarentena y/of isolacion mesora y NO por participa na e programa di opvang.
Teniendo esaki na cuenta Arubahuis y e mentornan ta haci un suplica na tur studiante cu ta biahando cu e grupo di beursalen 2021 pa por fabor cuida curpa, pa evita fiesta y aglomeracion e dianan prome cu salida for di Aruba. Aunke un studiante ta vacuna e por infecta y transmiti e virus pa demas persona cu posibel consecuencianan grave pa e programa di opvang y pa tur esunnan envolvi.
![](https://24ora.com/wp-content/uploads/2021/07/studenten.jpg)
Arubahuis y e mentornan kier conscientisa y adverti tur studiante y nan mayornan riba e consecuencianan grandi cu un posibel infeccion positivo ta trece cu ne na yegada na Hulanda:
- Studiantenan mester bay den isolacion den su propio vivienda.
- Den caso cu studiante no ta dispone di vivienda, den caso cu e vivienda no ta disponibel of muebla na yegada e studiante ta keda responsabel pa regla un luga unda cu por isola cerca famia y/of amistadnan na Hulanda.
- Gastonan di test, isolacion y cualkier otro gasto ta keda responsabilidad di e studiante y mayornan.
- Keda sin por participa na e programa di opvang pa motibo di COVID ta nifica cu e studiante no por atende cita y regla asuntonan importante cu mester keda cla na tempo pa por establece su mes oficialmente na Hulanda y pa por cuminsa cu su school.
![](https://24ora.com/wp-content/uploads/2021/07/DSC09141.jpg)
Ta e deber y responsabilidad di Arubahuis y e mentornan pa informa tur studiante y mayor di esaki y pa aplica e reglanan aki na un manera estricto pa asina proteha tur studiante y demas persona y instancia envolvi. Ta haci un apelacion riba tur studiante y nan mayornan pa por fabor cuida curpa y pa ta responsabel prome cu salida pa Hulanda sino e ta imposibel pa Arubahuis y e mentornan por garantisa salud y siguridad di tur studiante y personal.