Tur aña FAVI ta para keto y ta pone atencion riba dia international di garoti blanco strepi cora. E importancia di un garoti y su uzo den trafico.
Poco ta esnan den comunidad cu a yega di mire. Ta pa e motibo aki FAVI a scoge pa pone atencion riba e uzo corecto di djie den trafico pero tambe pa motiva clientenan pa sigui uzele bon.
Diabierna awor 12 di oktober FAVI lo tin dos actividad di concientisacion. E prome lo tuma lugar parti mainta di 09 :00 – 11 :00 den e area entre Citgo Boulevard y Hamaca na Linear Park. Automobilista lo MIRA nos sigur ta mobilisa cu nos garoti blanco strepi cora.
Atardi entre 3 :00 – 4 :00 pm. FAVI lo tene su accion di concientisacion hunto cu su muchanan den e area di retonde di St. Cruz.
Pues automobilista tene cuidao! si bo mira e garoti, para pe! Zona un pito suave y bisa nos crusa numa.
Abo conoce e garoti blanco ?
Un garoti blanco ta un medio auxiliar pa un persona cu tin un limitacion di bista of un persona cu ta ciego. E ta un medio di indentificacion tambe, si bo mira un persona cu e garoti esey kiermen cu e persona aki tin un problema di mira.
Un persona visualmente incapacita ta usa e garoti, pa 2 motibo importante :
- Pa hala atencion di otro peaton y esnan participando na trafico, cu e persona en cuestion no ta mira bon of ta ciego. Ta usa e garoti di guia specialmente ora di crusa caya, pero ta us’e tambe pa mobilisa su mes por ehempel rond di cas, den supermercado of den caya.
- Pa orienta den su mes ambiente, pa localisa puntonan di orientacion y pa nota obstaculonan na tempo.
Na momento cu un automobilista, ciclista etc. mira un persona cu e garoti blanco strepi cora cu ta indica cu e kier crusa, e mester cuminsa baha velocidad y dunanan e oportunidad pa haci esaki.
Con un usuario di e garoti blanco ta indica cu e kier crusa ?
E usuario di e garoti ta indica cu e kier crusa dor di hisa su garoti stret su dilanti, ora ela jega na e zebrapad of caminda cu e ta bai crusa. Despues e ta scucha si e auto a stop y den aproximadamente 2 seconde e ta cuminsa na crusa e caminda. Ora cu e jega meymey di e caminda e ta baha e garoti y ta fula pa e trotoir. Ora e automobilista mira un persona cu ta bai crusa cu su garoti, e por zona un pito suave pa asina duna e persona e señal cu e por crusa.
Con e guia di FAVI ta sosode ?
E terapista di revalidacion ta duna instruccion na e cliente con e uzo di garoti mester sosode. Esaki por ta den e vecindario cu e cliente conoce y tambe na lugarnan desconoci pa e cliente. Despues cu e cliente ta domina e canamento cu e garoti e ta bai ariba caminda publico cune. E cliente ta siña usa su oido bon y ta siña interpreta kiko ta pariba, pabao, crusa caminda etc.
Na Aruba sinembargo hopi cliente tin miedo di haci uso di careteranan. Un di e motibonan principal di esaki ta e trafico insigur y na cierto parti di Aruba e infracstructura no ta adapta na hendenan cu limitacion visual.
FAVI ta compronde e miedo di su clientenan pa cana riba caya y pesey ta haci un suplica na comunidad pa tene cuenta cu esaki. FAVI lo keda concientisa nos comunidad y keda stimula nos clientenan pa haci uso di e garoti blanco riba caya y tambe den nan ambiente social.
