Plan Tecnico desvela primintiendo un solucion pa e problematica di RWZI

Durante un conferencia ayera tardi Aruba Waste Water Solutions (AWSS) a duna di conoce e plan tecnico di e trabounan cu lo haci ariba Rioolwaterzuiveringsinstallatie (RWZI).

Pues esaki ta marca un momento historico ariba nos isla pasobra pa decada e problema di awa preto ariba Aruba a keda sin wordo atendi adecuadamente. E sistemanan di purificacion cu ta funciona ariba nan capacidad ta un menasa directo ariba nos sector turistico, nos medio ambiente y nos economia. Despues cu e ley a pasa pa delega e maneho di e plantanan aki na un entidad priva, a move lihe pa por realisa e prome stapnan di e compania recientemente forma. Esaki gobierno ta bisa riba un publicacion haci.

Ta menciona cu awe ta conta cu un ekipo capacita cu ta cla pa ehecuta un di e misionnan nacional mas importante den nos historia. Ministerio di Naturalesa, conhuntamente cu Ministerio di Energia y Asuntonan General a haci esfuersonan grandi pa por yega na unda cu ta awe, ta desea AWSS hopi exito cu nan tarea.

Minister Arends ta duna un danki special na Jossy Figaroa kende a lidera e comision encarga cu e privatisacion di RWZI. Ademas, ta gradici Marlon Croes y Ton Rojer cu a traha incansabelmente pa por a logra esaki.

“E paso cu wordo tuma awe siguramente ta un di e logronan mas importante di Gabinete Wever-Croes II. E colaboracion interministerial pa cu e solucion di e problematica di RWZI tabata uno clave. Ministerio di Naturalesa tambe ta gradici colega Minister President Evelyn Wever-Croes y Glenbert Croes pa esaki y pa brind’e e confiansa pa por a lidera e esfuersonan eherce.”

Sinembargo den henter e articulo cu por a lesa riba e pagina di Gabinete Wever-Croes II, no ta menciona nada di e Plan Tecnico mes.