E barco Zr. Ms Groningen ta den un patruyahe den Caribe y asina a bin intercepta durante diferente accion un cargamento di droga y un cantidad grandi di placa en efectivo. Tambe nan a rescata un persona.
Riba e anochi di 10 di juli e barco a detecta un asina yama Go Fast, cu tabata moviendo riba velocidad halto den lama di Caribe. Dos FRISC, boto di intercepcion di Groningen a logra para e Go Fast y a guia nan direccion di e barco. Abordo di e Go Fast a haya 424 kilo di cocaina. E droga confisca y e personanan a wordo poni den man di Polis di Sint Maarten. Esaki riba mercado Mericano tin un balor di 127 miyon dollar.
Dos dia despues a canta bingo atrobe ora cu e helicopter NH-90 di e barco marino a señala otro Go Fast. A dun’e diferente advertencia pa e paga motor, un francotirado a tira riba e motor di e Go Fast. E tripulante spanta a tira e mercancia na e momentonan ey den lama caba, cu a conduci na un buskeda riba lama por medio di e botonan FRISC. Durante e buskeda a haya un tas cu un cantidad grandi di placa efectivo. E placa y e tripulante deteni tambe a pasa pa man di Polis di Sint Maarten.
Mas laat e dia ey e Dash, cu ta e avion di patruyahe, a señala un Go Fast sospechoso. A manda e helicopter NH-90 di Groningen direccion di e punto en cuestion. E speedboat a subi velocidad y no a sigui ordo pa e para y un biaha mas e Francotirado a los tiro riba e motor. For di aire a constata con mercancia tabata wordo tira den lama. No a logra haya e paketenan aki. A detene e sospechosonan y a entrega nan na Polis pero mientrastanto ta liber pa motibo di falta di prueba.
Durante e tres accionnan aki tabatin un colaboracion estrecho cu Kustwacht di Sint Maarten cu a haci uzo di nan Metal Shark Interceptors. 
Diadomingo ultimo e helicopter NH90 a rescata un persona di un boto di pesca cu a bolter. E naufrago a wordo recoge pa personal di e barco Zr Ms mientras cu e otro tresnan a haya ayudo di e helicopter di Guarda Costa Mericano.
Desde 20 di april, 2019 Zr. Ms Gronigen ta nabegando den area di Caribe. Ta uza e barco aki durante operacionnan antidroga y ayudo humanitario. Banda di esaki, ta uza nan tambe pa diferente tarea di Guarda Costa den Caribe manera pesca ilegal, delitonan ambiental y accionnan di SAR (Search and Rescue). Pa cumpli cu e tareanan aki, Zr Ms Gronigen ta dispone di dos boto FRISC y un helicopter NH-90.
