Na december ultimo TOB Carnival Group a corona nan reina infantil, Ziah Amalia Salomon, cu lo representa e grupo den eleccion di e di 46 Reina Infantil di Aruba su Carnaval.
Ziah tin 7 aña di edad y e ta alumno di Scol Primario Kudawecha, den klas 3B. E ta gusta hunga cu su amiguitonan, e ta gusta baila y tambe e gusta bay wak pelicula.
El a gusta e acto di coronacion, ora cu juffrouw Jeanique a bistie su corona y a bistie su sjerp tambe.
Hunto cu su grupo di baile Mini Dazzling Dancer, nan ta preparando su show, unda c’un total di dies mucha lo bay forma parti di dje den e eleccion.
Su show mes ta cla pero esaki ta un secreto y e no tabata kier a divulga nada. Tur dia e ta train y su training ta tur dia.
El a conta tambe cu ta lider di T.O.B., Lissette Chung a manda un mensahe p’e mama di Ziah Amalia, p’e bay pa baby TOB. Despues a bolbe pidie pa bay pa reina infantil y asina su preparaicon a cuminsa, for di prome cu e acto di coronacion caba.
Pa ultimo, Ziah Amalia a pidi pa tur hende pasa bon, gosa di Carnaval y pa disfruta di un temporada di carnaval masha dushi mes.
Eleccion di Reina Infantil di Aruba su Carnaval lo ta dia 21 di januari 2023 riba Plaza Betico Croes.
