Zachary Quandt condena na 10 aña pa asesinato di Ski Arrindel

Hues awe mainta a dicta sentencia den e caso penal cu Ministerio Publico a entama contra un grupo di 6 hoben, envolvi ta meti directo of indirectamente den e asesinato premedita di Hubert “Ski” Arrindel den Rancho dia 18 di augustus 2018. Hues y Fiscal obviamente no ta pensa mesun cos den e caso aki y Corte a rechasa varios di e demandanan cu Ministerio Publico a pidi durante e caso. Incluyendo un castigo di 18 aña largo a caba na declara e acusado liber!

ADV


E sentencianan:

Pa Joseph Boekhoudt, Fiscal a pidi 4 aña cera den “Jeugddetentie”. E tabata menor di edad dia di e hecho. Hues a mantene e demanda di Ministerio Publico, pero a duna e acusado 1 aña condicional, si e sigui e trayecto bou un psicologo pa atende su problemanan di comportacion. 


Pa Sypress Kock, Fiscal a pidi 1 aña interna den un “gesloten inrichting”. E tambe tabata menor di edad dia di e hecho. Hues a hisa e castigo y a ordena pa cera e hoben aki pa 2 aña den un centro hubenil.


Pa Zachary Quandt, Fiscal a pidi 18 aña di prizon. Hues ta haya cu no por trat’e den Corte Hubenil. Asina mes a tene cuenta cu e ta un “First offender”. Hues a castig’e na 10 aña di prizon, kitando e tempo cu el a pasa cera caba. 
Pa Thomas Werleman, Fiscal a pidi 1 aña di prizon. No a trata e caso aki ainda. E ta pendiente. 


Pa Jorcy Werleman, Fiscal a pidi 18 aña di prizon. Pero Hues a subraya awe cu no tin prueba suficiente ni convincente den e caso presenta na dje. Pesey a dicidi di declara e acusado liber di tur acusacion! E no ta deteni mas y a cana su mes drenta Corte y a sali satisfecho bek. 


No por prueba asesinato premedita

Zachary Quandt condena na 10 aña di prizon pa asesinato di Ski Arrindel

Zachary Quandt condena na 10 aña di prizon pa asesinato di Ski Arrindel

Posted by 24ora on Friday, April 12, 2019

Generalmente Hues a bisa awe den Corte cu Ministerio Publico no por a demostra cu tabata trata aki di asesinato premedita. E hecho cu e grupo a sali cu un arma den auto no ta suficiente prueba pa condena nan pa esaki. Specialmente teniendo cuenta cu a pasa un club prome, a bebe alcohol a droga y despues a pasa den Rancho. A tene cuenta cu a puntra dos biaha den auto si mester tira of no, pa cual por lo menos tres di e acusadonan a apoya e idea, pa cual Quandt a los e tironan. Locual si por prueba ta tiramento y portacion di un arma di candela den forma ilegal!


Dia di e asesinato

E grupo tabata riba un trip e anochi ey unda cu Joseph y Sypress a bay busca e otronan. Pakico a sali cu arma, niun no por a duna un contesta convincente y Sypress ta bisa cu no sa mes cu Joseph tabatin un arma di candela y nunca el a wak’e, y mesun cos ta wordo bisa door di Jorchy. E ta bisa cu den e auto Joseph a mustra nan un tas den cual e tin un arma, pero e no a mira e arma mes.

Despues di a bebe y uza droga, e grupo a coy direccion di Rancho, unda nan a pasa dos biaha prome cu dado momento Joseph a para e auto y a pasa Zachary e arma. E acusado aki a puntra su amigonan “tira of no tira” y el a scucha nan grit’e “tira, tira, tira”. Asina el a baha bentana y a los tiro direccion di un algun persona di Gang di Madiki tabata para. Pero e bala alcansa e conocido Sky, kende tambe tabata para eybanda. Despues nan a huy for di e sitio y a coy direccion di San Nicolas. Polisnan no tabata sa nada di esnan responsabel te ora cu Zachary a bay entrega su mes hunto cu su tata y su Abogado.

Famia no ta nota arepentimento

Famia di Ricky Hodge, e unico yiu di Ski Arrindel y Nathalie Tromp tabata den Corte. Ricky mes ta hungado di futbol pa SV Dakota y ta na Corsou regresando nos isla awe mainta. Su prima, pero cu a lanta cune manera ruman muhe tabata den Corte awe mainta. Suhaël Lake a bisa na final cu e ta lamenta cu no a nota ningun sorto di arepentimento di e asesinonan. Es mas, Quandt a pasa ta smile y a hisa su dedenan di “peace” den halto saliendo for di sala di Corte cu su mannan na boei. Famia ta insisti, sea cual sea ta e bisa cu Ski a scoge pa biba, no ta hustifica nunca pa ningun hende tir’e mata asina sin cu el a haci e hobennan aki nada. 

Cu si Ministerio Publico lo apela e sentencianan of no, nan no sa. Fiscal a papia cu Ricky Hodge, yiu di Ski durante e proceso y a bis’e cu no mester busca abogado ni nada pasobra Ministerio Publico mes lo maneha y atende tur cos den e caso. Cu Hues a baha e castigonan asina drastico, lo keda awo den man di e mesun Fiscal pa dicidi con e ta bay bringa e caso y defende e demanda presenta pero cu no a convence e Magistrado. Kisas si presenta e caso dilanti tres Hues den Corte di Apelacion, nan lo por mira e caso diferente y toch tene cuenta cu e sentencia mester ta mas halto pa e acto lamentabel cu e hobennan aki a comete. 

Comments

comments