Colegio San Antonio na Sta. Cruz ta pone hopi enfasis riba e desaroyo personal di su alumnonan. Aunke e espacio pa haci esaki ta limita riba e curiculo di un scol, Colegio San Antonio ta haci uzo di dianan disponibel pa actividad pa ofrece su alumnonan diferente workshop pa traha riba habilidadnan cu e alumno por uza den futuro asina yama “life skills”.
Pa logra esaki e scol ta busca diferente partner pa yuda organisa seminario riba diferente topico. Hunto cu Aruba Excellence Foundation y nan Aruba Certification Program, Colegio San Antonio a organisa un Youth Event pa alumnonan di Ciclo Avansa 1 na Ritz – Carlton Aruba. Aki e alumnonan a haya sa mas di e Aruba Certification Program como tambe e secreto di Aruba su Felicidad cu ta nos Zjeito. Ta importante pa e alumno siña e balornan cu ta haci nos Rubiano debi cu esaki ta forma e base di nos formacion como ciudadano di e isla aki.
Otro partner cu a colabora cu e scol durante di e Youth Event tawata Fundacion Museo Arubano cu a duna un workshop riba “storytelling”. E ta hopi importante pa un alumno por sa comunica cu un otro y bende su mes como futuro empleado of porta bende su producto. Banda di FMA Ritz-Carlton Aruba tambe a facilita un workshop tocante di e calidad di servicio di e hotel. E facilitadornan di Ritz-Carlton a splica entre otro kico un persona mester tin pa traha na un di nan hotelnan, cua ta e actitud cu ta word spera di nan empleadonan y con nan ta comunica cu un guest.
Por ultimo un grupo di alumno a ricibi un workshop di Aleida Hector cu a splicanan e mensahe cu bo forma di bisti ta manda pa otro. Con bop or bisti di forma autentico y original pero respetando e lugar of occasion caminda bo ta na e momento ey.
Colegio San Antonio kier gradici tur partner pa nan aporte y ta spera di sigui conta cu nan apoyo den futuro. Tambe nos ta spera cu e alumno poco poco ta yena su tas di bida cu diferente habilidad cu e lo por uza den futuro. Mañan mes e alumnonan di klas 3 por pone loke nan a siña awe den practica. E alumnonan a haya e oportunidad di scol pa haci un “snuffelstage” di un dia na un organisacion of compania di nan mesun scogencia. Nos ta desea tur nos alumnonan hopi exito cu e poryecto aki.
