Yonaiquer Sanchez: Mester tuma medidanan contra Trudy Hassell

E criticanan como e denuncianan contra e hefe di Guarda Nos Costa (GNC) sra. Trudy Hassell ta sigui bini padilanti. Principalmente e violacion di regla y derechonan humano cu sigur ta algo cu Aruba no por permiti su mes di haya su mes envolvi den dje. No ta descarta cu na final Hulanda of instancianan internacional ta bay habri un investigacion.

E cantidad di hendenan cu ta subi caya y manifesta contra Gobierno di Nicolas Maduro y e asesinato di hobennan cu ta manifesta, ta pruebanan suficiente pa considera duna Venezolanonan asilo politico of proteccion internacional contra e Venezolanonan. “Eseynan ta prueba suficiente,” Yonaiquer Sanchez, un defensor di refugiadonan Venezolano, a trece dilanti den un declaracion haci na 24ora.com.

Yonaiquer Sanchez : Tuma medidanan contra Trudy Hassell pa descriminacion, xenofobia y violacion di derechonan humano

Yonaiquer Sanchez : Tuma medidanan contra Trudy Hassell pa descriminacion, xenofobia y violacion di derechonan humano

Posted by 24ora on Friday, July 19, 2019

Ta pa e motibo ariba menciona e Movimento cu e ta guia ta haci un peticion pa tuma e medidanan legal contra Trudy Hassell pa descriminacion, xenofobia y violacion di derechonan humano reconoci internacionalmente. Pero tambe ta pidi pa pone un paro na e persecucion di e Venezolanonan cu ta bibando na Aruba caba.  Den su declaracion el a bisa bon cla, cu nan no ta lucha contra detencion y nan ta di acuerdo pa controla e inmigrante. Pero loke nan no ta di acuerdo cun’e cu ta uza descriminacion, xenofobia y violacion di derechonan humano, pa cansa e Venezolano y pa e renuncia di forma boluntario riba su proteccion internacional.

Ehecucion di e control aki mester sosode door di e seccion di integracion di DIMAS. E hecho cu un Venezolano mester raporta tur dia na cuartel di Guarda Nos Costa, e ta considera un medida descriminatorio, pasobra no tin acto criminal a tuma luga. Mas ainda pasobra ta trata di personanan cu a pidi asilo politico of proteccion internacional y ta obliga nan pa presenta tur dia na un centro di detencion. Na di dos luga, el a cuestiona e confiscacion di e paspoortnan, cu ta un documento perteneciente na estado Venezolano. “Ki sentido tin pa bo kita mi identidad priva cu ta pertenece na estado Venezolano. Basa riba ki ley sra Trudy Hassell ta basa su mes, pa laga e Venezolano indocumenta” e ta puntra.  P’esey el a haci un yamada na DIMAS pa tuma control di asilo politico 100%, den tur e fasenan.

Tambe el a pidi liberacion di e Venezolanonan deteni na GNC pa 4 luna caba. Y ta puntra di ki delito ta señala e hendenan aki pa mantene nan cera. Violacion di un ley di estadia no ta un crimen suficientemente grandi pa mantene un persona deteni pa mas cu 4 luna. Pio si nan ta cera na e Centro Dakota cu no tin e infrastructura adecuado. Ainda ta cera hende na Centro Dakota.

Pa finalisa el a bisa cu cualkier persona cu ta pensa algo diferente contra Trudy Hassell, e ta tuma represalia, manera cu el a haci cu e famia di Sanchez mes. “Mi ta residente di e pais aki y mi tin derecho riba libertad di expresion. E hecho cu mi ta para aki y haci un denuncia, no ta nifica cu esaki ta duna un hende of instancia e derecho pa tuma represalia contra mi persona …. Tur represalia cu tuma contra dimi, ta keda pa responsabilidad di sra. Trudy Hassell.”

Comments

comments