Diaranson mainta un grupo di como 100 mucha cu ta tumando parti den e Summer Camp di
YMCA tabata huesped di Aruba Symphony Festival na Cas di Cultura caminda e Aruba
Symphony Orchestra tabata esayando pa nan concierto di awe nochi.
Despues di yama e muchanan bonbini na Cas di Cultura, Carlos Botero, e Director di e
orkesta a papia cu e muchanan y splica nan con un orkesta ta funciona. Ora cu a sali cu
apenas cuatro di tur e muchanan a yega di mira un orkesta, e Maestro Botero a indica con
tur e instrumentonan ta posiciona y di cada instrumento un tocador a mustra con e ta zona.
Tambe tabata ensayando e solista di awe (diahuebs) anochi, e ganador di e competencia di
studiantenan aña pasa, Juan Sebastian Cortes, clarinetista. El a duna un demostracion fantastico di su maestria di su instrumento y a mustra ta pakico e hurado a otorgu’e e Clyde Harms Scholarship ana pasa y pakico el a haya e honor di toca solo awe nochi.
Botero a sigui splica e muchanan con importante ta pa mantene silencio ora cu e orkesta ta
toca pa tur hende por tende tur nota cu wordo toca. E mensahe aki tabatin su efecto! E
muchanan a mantene silencio pa henter e movemento di Clarinet Concerto in A major,
K.622 di Wolfgang A. Mozart. Ora cu e Director a puntra nan si nan kier keda pa e siguiente
movemento cu lo dura dies minut, e contesta tabata unanimo.
Si! Na final e grupo di campers di YMCA a duna un fuerte aplauso na e orkesta y e lider di e
grupo a bay gradici e Maestro y Aruba Symphony Festival pa e bunita gesto di ricibi e
muchanan pa un evento asina educativo y memorabel den nan bida. E ensayo tabata parti di e concierto di awe, “Mozart on One Musical Island” na Cas di Cultura cuminsando 8 PM precies. E concierto ta bay ta den sala grandi y entrada lo ta gratis atrobe. Corda cu e Concierto di Clausura ta diasabra anochi 8 PM na Cas di Cultura cu e Aruba Symphony Orchestra completo ( mas di 80 musico). Riba e programa tin dos “premier”: E di prome ta e premier mundial di e obra “Preludio a un Venturoso Amanecer” di Victor Marquez-Barrios, e compositor/guitarista Venezolano contemporaneo. E otro ta e premier Americano di “Symphony No. 3 Op. 153” di Joseph Joachim Raff, e compositor Aleman naci na Suisa (1822 – 1882). E concierto aki lo ta e unico di e aña cu no ta gratis, peo asina mes hopi
razonabel. Awg 40 pa adulto y 20 florin pa muchanan bou di 18 aña. Tickets ta disponibel na Cas di Cultura. E muchanan di YMCA a scucha cu hopi atencion na Aruba Symphony Orchestra y e solista Juan Sebastian Cortes, Clarinetista, tocando musica di Mozart
Aruba Symphony Orchestra y e solista Juan Sebastian Cortes, clarinetista, ta ensaya pa e concierto di diahuebs anochi na Cas di Cultura
