Yiunan a vence: A cancela entiero di Mia Figaroa te ora haci autopsia di nobo

14373

Awe a despedi di Maria “Mia” Figaroa na Aurora Funeral Home. Lo a crema e defunto despues di e ceremonia di despedida, den seno di famia. Pero su cuater yiunan a para riba cu nan NO kier pa crema ni dera nan mama ainda pasobra nan no ta convenci di e morto di nan mama. E resultado di e autopsia keto bay ta desconoci pa nan y Polis a dicidi pa cera e caso, siendo nan tin hopi pregunta. A pidi, a suplica y a roga pa Gobierno para e entiero pasobra nan kier haci un otro autopsia. Parce abogado a yama na e funeraria y na final e yiunan a convence e funeraria pa para e entiero.

Cu esey awor nan mama lo keda den freezer pa autoridadnan por haci un autopsia di nobo. E yiu muhe a bisa 24ora.com cu su mama ta tur na sla, tur blousa, rudia kibra y bolombonchi grandi na frenta. Nan no ta kere cu tur e slanan y marcanan di sanger ta bin dor di intoxicacion. Nan ta pensa cu a asesina nan mama malamente y cu nan mama merece husticia.

Yiunan kier para entiero: Famia di Mia Figaroa no kier crema e defunto ainda, tanten cu no haci un di dos autopsia.https://24ora.com/yiu-muhe-na-rudia-dilanti-funeraria-ta-suplica-gobierno-no-laga-nan-crema-mi-mama-nan-a-asesine/

Posted by 24ora on Thursday, July 30, 2020

Na un principio otro parti di fami a pusha duro pa sigui cu e entiero y crema Mia. Pero, e yiunan, siendo su herederonan y famia di prome grado, a logra convence e funeraria cu ta nan decision cu nan mama “no ta cla pa bay”. Consecuentemente lo spera awo te dia keda cla cu un otro autopsia y cu famia ta cla pa e ora si crema nan ser keri.

Mia a fayece hunto cu Tio diaranson ultimo den forma intoxica den Latin Passion Bar den Caya Captain Rodgers na San Nicolas. Tabatin 4 hende for di tino den e bar benta na suela, di cual 2 a fayece na e sitio y 2 mucha muhe hoben a bay cu Ambulance pa Hospital. Awor ambos victima ta bisa cu nan no ta corda nada mas y no por bisa con tur cos a sosode. Nan tambe ta keha di dolor na curpa, sin cu nan sa con bin nan a yega na e slanan aki na curpa.