A surgi un situacion hopi fastioso pa famia Montaner. E yiu Ruman Montaner ta preocupa cu ta hospital parce ta cambia tratamento di mas cu 20 aña di su mama y nan no kier lag’e sali tampoco. E mama di 88 aña a cay pa cual riba conseho di dokter a laga intern’e pa e por haci un CT Scan. A haci esaki pero tambe a haci test di COVID-19 cu ne, cual a sali negativo.
Loke nan ta cuestiona ta cu debi na falta di espacio, a pone e mama di 88 aña riba e piso di COVID-19 den isolacion. Esaki ta algo cu e yiu no kier. “Nos a cuida nos mama bon durante e aña di coronavirus y e no a wordo contagia,” e yiu homber a conta.Nan ta preocupa pasobra semper nan a cuida nan mama bon y a sigui e tratamento di hormona cu e tin pa mas cu 20 aña caba y nan a compronde cu lo ta cambia e tratamento aki, sin consulta cu nan. “Nos tin derecho pa haya informacion, y haya sa kico ta haci cu nos mama.
Ta dunando un tratamento sin consulta cu su dokter di e cas. E famia incluso a pidi intermediacion di polis pa nan haya informacion, pero aparentemente como cu ta fin di siman, no ta haya e contacto necesario. Den un declaracion duna 24ora.com, e yiu a conta tur loke nan ta pasando aden den nan intento pa hiba su mama cas bek.
