Un caso hopi conmovedor tabatin diabierna mainta den Corte. Un caso unda cu un mama a perde su bida na man di su ex pareha y den presencia di su yiu muhe di 10 aña. “Papi, lagami mi mama los y mi lo stimabo hopi mas,” e hobencita mirando su mama a suplica e tata.
Aurelio Dirksz a presenta awe mainta dilanti mesa berde acusa na prome luga di asesinato premedita y si esaki no keda proba, na di dos luga e ta wordo acusa di “doodslag”, di a mata e señora.
E hecho aki a tuma luga dia 23 di april, 2019, ora cu e acusado aki a bira jaloers pa motibo di a mira un otro homber den un auto dilanti cas di su ex partner. Scondi el a mira con un di su yiunan a para na auto un rato pa despues e mama di e muchanan a yega para na e auto combersa un rato. Tur esaki el a para wak y a keda scondi te ora cu e homber a bay for di e sitio.
Loke a pasa despues paden, ta muestra cu nunca el a acepta cu e relaciona a finalisa y su actuacion, Fiscal a bisa, ta simplemente di un homber jaloers cu no ta acepta cu un muhe ta pone fin na un relaciona. “Lamentablemente aki na Aruba mayoria di e casonan di violencia entre ex parehanan ta debi na esaki. Hombernan cu no por acepta cu e muhe ta pone un fin na un relacion amoroso.”
E version cu e acusado a duna den Corte tabata mustra uno inocente, cu tur cos a bay trankil, cu el a simplemente sinta riba e cama y bisa e muhe di con el a gañe cu e no tin un amigo nobo. Lamentablemente e parti di inicio di e discusion ta su banda so tin, ya cu e victima (Natasha Kock) a fayece. Segun el a bisa Hues, despues cu el a reclama su ex di a gañe, e muhe a dal’e dos cantiman. E momento ey el a gar’e na su garganta y pone den klem.
Loke cu e no tabata sa cu su yiu muhe di 9 aña, for di e momento ey a mira loke tabata pasando. A mira con su tata no kier laga e mama los, con e mama tabata trata di ranca pa kita e mannan for di su garganta. Den e momento di desesperacion ey e yiu bou yoramento a pidi e tata: “Papi, laga mami los y mi lo stima papi hopi mas”, pero esaki no a yuda.
Prome cu esey, e hobencita a bisa cu el a trata di ranca e mannan di su tata for di garganta di su mama, pero esaki no a logra ya cu e tata tin hopi forsa. Te ora cu e tata a mir’e ta yora, el a bis’e: “Stop di yora y mi lo laga bo mama los.” El a stop pero e tata no a lague los, sino te ora cu el a bis’e un biaha mas “lague los, wak su boca”. Ey ta caminda e acusado a dicidi di laga bay.
Den e estado ey e hoben a mira su mama drumi na suela y no ta reacciona. Pero e tata / acusado no a busca ayudo tampoco. El a simplemente skirbi number di celular di un tanta riba un papel y a bis’e: Mi ta bay, laga 10 minuut pasa y bay na e bisiñanan. Pidi nan yama e numbernan ey y bisa nan cu mami a cay flauw”. Pero ora cu e bisiñanan mes a core yega, ya caba el a fayece. E otro ruman chikito tabata den un otro parti di e cas ta hunga.
E situacion ta complica pasobra e declaracion di e yiu muhe ta loke a mustra con e actuacion di e tata tabata e dia ey y otro dianan prome. Entre otro e yiu a bisa cu tur dia e tata ta rabia y ta menasa su mama.
“Bo ta bisando cu bo yiu ta gaña,” Fiscal a keda puntra e acusado y na final el a contesta si. Esaki a pone e fiscal rabia mas hopi y a bis’e. “Na Polis ta declara un cos y awe mainta bo ta declara otro. Sea un homber y para den bo sapatonan y acepta bo responsabilidad. Bo ta simplemente un homber jaloers cu no kier acepta cu e relacion a yega su fin, no awo pero cuatro aña prome caba,” e Fiscal a bisa.
Fiscal a bisa na final cu no ta mira motibo pa no kere declaracion di e mucha, cual ta cuadra cu datonan compila den e investigacion. E declaracion di e tata mi tin tur motibo pa no kere den su declaracion. A base di castigonan den pasado, a pidi 14 aña.
E acusado na final a pidi pordon na su shete yiunan,su rumannan pa pone nan cara na berguensa y tambe el a pidi disculpa na famia, kendenan tabata yora e momento ey.
Aki tres siman tin sentencia den e caso.