Yiu muhe na rudia dilanti funeraria ta suplica Gobierno: No laga nan crema mi mama – Nan a asesin’e!

18710

Tragedia na Latin Passions Bar na San Nicolas cu hopi pregunta ainda di parti famia. Mientras cu Polis a entrega e curpanan sin bida na famia e mesun diahuebs atardi y un di e famianan a dera diasabra caba, awo merdia ta despedi y despues crema e di dos victima, esta Maria “Mia” Figaroa. Pero su 4 yiunan a papia cu 24ora.com pafo di Aurora Funeral Home, nan ta suplica Gobierno pa no laga nan crema nan mama. Nan no ta convenci cu nan mama a muri intoxica, nan ta sinti cu a asesina nan mama!

Un rato pasa e 4 yiuinan a papia cu nos colega Brian Koolman dilanti Aurora Funeral Home pa expresa nan disgusto. Maria los Angeles Agudelo, Chateryne Joanna Agudelo, Iryaahim Delamore y Jyaamhur Delamore tabata inconsolabel y a insisti cu nan no ta kere e storia di Polis cu nan mama a muri intoxica. Por lo menos Maria, e yiu muhe cu a papia cu nos, a conta cu el a reconoce su mama na mortuario na Hospital. Tabata un bista increibel, su mama tabata tur golpia, weso kibra, blousa y tabata duna indicacion cu el a lucha cu un hende prome cu el a muri.

Breaking News: Famia di Mia Figaroa malcontento

Posted by 24ora on Thursday, July 30, 2020

Mia Figaroa tabata un bouncer na clubnan nocturno y como tal sa con pa defende su mes, e por bringa si ta necesario. Pesey e yiunan no ta kere cu el a djis intoxica, pasobra te cu e sa, gas no ta kibra weso di hende den nan curpa. Segun Maria, su mama tabatin rudia saca for di luga y por a mira su wesonan masha mahos, como prueba cu a golpie. Banda di esey a nota marcanan na su garganta, cu segun e yiu, ta indicacion cu a choca su mama. Riba dje, ora a bay reconoce na Hospital, e tabatin su lenga saca afo. Riba dje, e yiu a conta cu el a haya su mama cu un deuk grandi riba su wenkbrouw.

Locual nan ta lamenta cu Polis nunca mas a bin sinta cu nan pa splica nan kico a pasa, resultado di autopsia y contesta tur nan preguntanan. P’esey, Maria ta roga na Gobierno y na ken cu e mester roga pa no laga nan dera (crema) su mama ainda sino pa haci un di dos autopsia. Durante e entrevista el a cay na rudia dilanti e funeraria y cu su mannan na otro e ta roga pa ayudo. El a bisa, hunto cu su rumannan, cu nan lo NO permiti pa nan crema nan mama y si nan mester drenta forno cu ne, nan lo hacie. Nan peticion ta pa laga nan mama den freezer, pa autoridad haci un autopsia atrobe, pa nan por yega na final di e tragedia doloroso aki.

E incidente riba su mes

E incidente a tuma luga diaranson dia 22 di juli ultimo banda di 11:12pm ora cu Alarm Centrale 911 a haya yamada di emergencia pa 4 hende benta for di tino pafo di un bar den Caya Captain Rodgers na San Nicolaas. Pa 1:30am Dr. Texier a constata morto di Maria “Mia” Figaroa di 47 aña di edad, mama di cuater yiu. Mia ta yiu muhe di ex-Polis Lou Figaroa, cu semper a biba cerca di Warda di Polis bieu di Noord mes. E otro morto tabata G. “Tio” Lopez di 42 aña di edad. E tabata biba na Hulanda pero a bin Aruba y como cu e no tin luga di keda, a regla pa e traha y biba den e bar na San Nicolas. 

Den e bar a topa tambe cu Jessica Vanessa Sousa di 31 aña di edad y Joslyn van der Linden di 23 aña. Nan dos awo a bira testigonan crucial pa conta di e sucedido. Sousa ta e prome cu a recupera, despues di observacion a regresa su cas. Mientras van der Linden a tarda un poco mas mirando cu e tabata den coma y no tabata sa kico lo tabata su situacion. Afortunadamente a recupera conocimento y ta mustra di a sali di e situacion di peliger cu e tabata aden.

Parce cu un homber, e mes un persona cu a busca e dos testigonan aki na cas lo ta esun cu a bahanan na Latin Passions Bar diamars anochi. Y e mes un persona aki lo a bay busca nan bek diaranson anochi pa hayanan den e bar benta, un dia despues!

E dos amiganan cu a keda na bida. Ningun di dos ta corda kico a pasa. Nan tambe ta bisa di tin dolor na curpa, comosifuera nan tin sla, pero no sa con nan a yega na e golpinan aki.

Pa locual ta trata e caso riba su mes, tin hopi incertidumbre y falta di informacion riba kico realmente a tuma luga den e bar. Hopi pregunta sin contesta y falta di convivencia di parti autoridad cu a atende cu e caso, ta e sentimento cu ta biba y ta locual ta haya di parti famia di e fayecidonan. Tin asta tin speculacion cu autoridad a trata e caso aki di otro forma mirande e pasado cu cada fayesido a hiba.

For di prome instante cu a sinti cu e famia di Figaroa no tabata convenci riba e teoria di intoxicacion, a fiha un orario cu recherche encarga cu e caso (Marsdin) di parti slachtofferhulp Jeanine Rodriguez, cu por cierto a haci un tremendo trabou pa atende cu e famia y purba di logra pone hunto e parti hudicial cu e famia pa nan yega na otro, pa asina descarta cualkier duda cu por tin. Despues di tres diferente encuentro cu no a presenta, a pidi famia pa presenta na Warda di Polis na San Nicolas dialuna merdia, pa asina sinta cu recherche. Un biaha mas Marsdin no a presenta pero a laga dos otro colega atende e famia. Akinan a exigi cu unicamente dos miembro di famia subi y haya un splicacion cu despues nan lo tin cu comparti cu e resto di famia.

Tres di e cuater yiunan brasando otro y consolando otro pafo di Aurora Funeral Home awe tardi. Nan ta bogando pa haya ayudo di Gobierno pa evita e cremacion. Nan ta roga pa haci un di dos autopsia.

Polis no a duna informacion di autopsia

A pensa cu polisnan encarga cu e caso lo a duna resultado di autopsia y riba kico a basa nan mes pa cera e caso y considera esaki un accidente / intoxicacion. Pa nan sorpesa esaki no a pasa y mucho informacion nan no a haya. A instrui nan pa tuma contacto cu Ministerio Publico si acaso nan ta desea di haya sa mas detayes. Pero cu for di aki e caso ta cera.

Locual cu a falta ta hopi convivencia

Den casonan delicado asina caminda tin dos victima fatal den un tragedia a spera hopi mas convivencia y sosten. Cualkier informacion cu por saca di duda con e echonan realmente lo a tuma luga, lo tabata un consuelo pa e famia. Esaki no ta locual nan a sinti. Te cu awe no a haya informacion concreto cu prueba y rapport pa mustra con e hechonan a socode.

Maria los Angeles Agudelo, yiu di Mia Figaroa, a cay na rudia awe tardi dilanti Aurora Funeral Home y cu su mannan na otro ta roga y suplica na autoridadnan pa scuch’e. E ta sigur cu su mama no a muri intoxica, sino nan a mata su mama. E ta esun cu a reconoce su mama den mortuario na Hospital, pues e sa kico el a mira y den ki estado su mama a yega Hospital. E kier un di dos autopsia, pasobra su mama merece husticia!

Kico ta locual cu autoridad ta bisa ?

Informacion cu a ricibi te cu awo riba e caso aki ta cu 2 vitima a fayece intoxica cu carbon monoxide produci di e generator den un di espacionan di e bar. Cu e otro dos victimanan no a ricibi e mes un % di gas den nan sistema y cu no tin ningun ordo di detencion pa ningun sospechoso relaciona cu e caso aki. Mas bien cu e caso aki ta cera y no tin motibo pa pensa cu un crimen a tuma luga.