Awe pa 2:46pm a bati alarma pa un cas na candela. Aruba un biaha mas, despues di hopi aña, a conoce un caso di un persona cu a perde su bida den un cas cu a kima. E hecho aki a tuma luga den bario di Papilon cu awe ta di luto, manera famia a bisa.

E cas situa na Papilon # 61-A, cas di famia Kock-Figaroa unda tin por lo menos 10 miembro di famia ta biba, a kima awe tardi. Ey ta biba e tata Riri, e mama Elsa (Maria), 3 yiu homber y un yiu muhe y nan yiunan y nan pareha. Un famia masha uni, cu awe a haya nan den un tristesa inespera, cu un candela cu a sorprende e famia, pero mas dolor ainda, a ranca bida di e yiu homber mas chikito.

Yiu mas chikito di famia Kock-Figaroa a kima awe den nan cas na Papilon

Yiu mas chikito di famia Kock-Figaroa a kima awe den nan cas na Papilon

Posted by 24ora on Monday, December 9, 2019

Durante pagamento di candela miembronan di Cuerpo di Bombero a bin encontra un curpa sin bida. Mesora a bati alarma y a yama instancianan concerni. Pa 4:00pm Dr. Texier a constata morto di Rigoberto Junior Chemi Gilberto Kock, naci na Aruba, dia 9 di october 1987. Te den oranan laat di atardi Polisnan Forensico a keda na e sitio pa investiga. Bisiñanan ta papia di un explosion y despues nan a mira candela, pero Brandweer ta desmenti esaki!

Comandante di Cuerpo di Bombero Aruba, Ing. Edward de Cuba, den entrevista na e sitio cu Patrick Paskel di 24ora.com, mientras cu Vocero di Cuerpo Policial Aruba, Sub Inspector Jose “Lito” Lacle ta siguiendo e declaracionnan di cerca. Brandweer a sigura cu e butishi di gas NO a rementa y cu mas bien e cayente di candela ta pone cu gas ta scapa for di e “valve”.

Na momento di e sucedido, segun por a compronde, tabatin dos hende so na e cas, e dos rumannan. Asina cu a mira e candela, Igor a core bay na bisiña pa yama Arugas y Brandweer. Den e cas tabatin dos pushi, un cacho y un coneu, cu el a saca prome cu e candela a plama. Su ruman, el a pensa cu lo por yuda su mes, sinembargo pa un of otro motibo no a logra bandona e cas.

Mientras cu autoridadnan tabata haciendo investigacion na e sitio, a detene Igor Kock, ruman homber di e fayecido. Aunke na prome instante a menciona cu e tin di haber cu investigacion pero a resulta cu el a stroba trabou di Polis pa cual a dicidi di hib’e warda.

Historia
Den pasado Aruba a conoce diferente caso di candela den cual un of mas persona a perde nan bida. E dos ultimo casonan tabata na San Nicolas, den Jan Steenstraat y Juana Morto Complex unda un persona, den cada caso, a kima den e candela (uno den baño y e otro riba cama). Prome cu esey tabatin e caso na Montaña unda un homber a perde su bida den un explosion di gas na un compleho di apartamento.

Casonan hopi mas bieu ta esun di un mucha di 5 aña, den un cas na Brazil, a perde su bida ora cu candela a sorprende e famianan den oranan di marduga y prome cu esey tabata e candela intenciona na Boegoeroei. Den esaki, e dos hombernan contrata pa kima e cas no a logra sali na tempo prome cu e explosion.

Mama di e victima, Elsa Maria Kock-Figaroa no tabata na cas na momento di e candela. Ora el a yega a inform’e di e candela. Un rato despues mester a bis’e acerca cu su yiu mas chikito a kima den e cas. E imagennan aki ta tuma un rato despues cu el a realisa kico ta pasando enrealidad na su cas.

Headlines Group, cas editorial di 24ora.com ta extende palabranan di profundo condolencia y forsa na henter famia den e momentonan dificil aki.

Comments

comments