Despues di casi 15 luna cu e mercado di industria crucero a cera, diaranson porfin Aruba a ricibi e prome barco crucero.
Ghislaine Posier, doño di un di kiosconan a bisa di ta hopi contento cu porfin un crucero ta bin bek Aruba.
Posier a bisa cu durante cu e kiosconan tabata cera, economicamente nan tabata tin’e hopi duro. Nan no tabata tin entrada, pero si nan tabata tin compromisonan financiero cu nan mester a cumpli cu nan. Awo cu e industria di turismo a cuminsa bek, situacion lo mehora pa nan.
Otro doño di kiosco, Juliana di Manche tambe ta hopi contento y gradicido cu Dios y tur e personanan envolvi cu yegada di e crucero na Aruba dia di awe. Despues di tanto tempo cu stress y tur e problemanan, awo e prome crucero t’ey bek. Nan ta orguyoso cu awo cu e industria a cuminsa bek, esaki lo genera entrada pa nan tambe.
Emocion tabata grandi despues di un aña cera, emocion tabata grandi. Como artista, cu e kiosconan cera, e ta hopi emociona cu porfin e kiosconan a habri bek.
Trudy Lampe a splica cu a pesar di tur e contratiemponan, nan a logra sobrevivi y ta gradicido cu por lo menos nan por a habri, y cu nan por haya e promocion di parti di hotel, pa asina nan por sigui haya entrada.
Lampe a sigui bisa cu e cruceronan lo no bin manera nan tabata custumbra cu ne, pero asina mes nan ta contento. Entrada di e prome crucero despues di 15 luna cera, tabata un sentimento di hopi alegria cerca doño di kiosconan.
El a lamenta si cu gobierno no a haci mucho cos pa nan y cu a tira tur cos den scochi di DIP. Pero nan ta spera cu awo cu e industria crucero a cuminsa bek, cu nan por sigui haya entrada pa reactiva economia.
