Campeonato fast pitch femenino U17 di Aruba Softball Bond a termina recientemente. Aruba Softball Bond cu e vision pa organisa campeonatonan pa nos hobennan cumpliendo cu exigencianan Internacional entre otro di WBSC a organisa e aña aki un campeonato di fast pitch femenino U17 cu miras pa den aña 2020 por organisa tambe U15.
Den cuadro di e campeonato U17 por mira atras riba un campeonato exitoso unda equiponan Lady Blue Marlins di Noord , Rockets di Sta Cruz y Eagles di San Nicolas a participa hungando tres round contra otro. Den e liga aki Eagles di San Nicolas a titula campeon invicto y mesun dia ASB a bay over pa entrega premionan mesora despues di wega. Tanto premionan como equipo pero tambe premionan individual. Yee Mei Cheong mihor cariñosamente conosi como “Beba” Cheong tabata un di e atracionnan principal di henter e campeonato. Un hobencita di apenas 16 aña cu multiple talento a resalta y destaca den su performance total. Beba Cheong ta un “Rising Star” como pitcher y como atleta a termina campeonato cu un record di 4-0.
Beba a lansa 17 inning, enfrentando 68 bateador, permitiendo 5 hit, propinando 39 strike outs, regalando 8 base por bola permitiendo 2 careda sushi cu un ERA di 0.00 ta bay cu e titulo di Champion Pitcher. Outstanding performance. Den Playoff Beba ta gana dos wega adicional pa hasi su equipo campeon. Beba Cheong como bateador a reclama e premio di Champion batter cu averahe di 727 cu 18 plate appearence, a bay di 11-8 cu 6 careda impuha, 15 careda anota, 6 base por bola negosha y 11 base roba cu un porcentahe di subi base di 0.833. Durante e serie final Beba Cheong ta conquista e titulo di MVP y asina a bari e liga cu mayoria premio individual banda di e titulo di campeon como equipo. Ashmilayne Maduro otro hoben talentoso di e equipo di Eagles ta conecta un homerun riba cabez di rightfielder y ta bay cu e titulo di champion homerun.
Ashmilayne Maduro ta caba campeonato cu 13 turno y 7 hit cu dos doblete un triple y un homerun pa un averahe di 538. Tremendo actuacion di un otro hoben. Aruba Softball Bond ta felicita Yee Mei Beba Cheong y Ashmilayne Maduro cu nan titulo nan personal, equipo Campeon Eagles y Sub Campeon Rockets y tur atletanan cu a competi, managers y coaches y alaves kier gradisi FFD pa cooperacion cu tereno, Stichting Subsidie Aruba, Heineken, Scorers y Umpires y sigur tanto Zuleyca Willems como coordinadora di Umpires y wega y tambe Estefano Croes y Alfred Huntington coordinando scorers. Mas cu klaro e fanaticada grandi y bibo tanto di Lady Blue Marlins, Rockets y Eagles. Danki pa e bunita campeonato. Pabien y den 2020 nos lo engrandese e liga aki.
