E tabata parce mas bien un pelicula di accion completo na Tamarijn awe. A detene e conoci di husticia, yama “Harrypotter”, despues di un persecusion peligroso di Santa Cruz te cu Tamarijn. Den un Yaris el a core pa polis cu a dun’e instruccion pa para. E tabata core cu menos bon intencion tras di e takelwagen cu tabata hiba e auto cu net polis a caba di confisca pa Hit and Run dilanti su cas na Tamarijn. Ora takelwagen y polis a caba na Tamarijn, e sospechoso a subi un Toyota Yaris color blanco y a opta pa sigui e takelwagen. E chauffeur di e takelwagen a yama polis bisa kico tabata pasando. Polis a bay mesora pa yuda.
A escolta takelwagen pa warda di Balashi y otro patruya a bay tras di e Yaris cu dos sospechoso aden. E forma cu e Yaris a core tabata increibel. A hinca e trafico den peliger te na Tamaijn. Harrypotter a core drenta mondi. Tabata un buskeda masal di hopi Polis y Recherche. A mira Polisnan cu arma den man cu mondi full rondona. Helicopter tambe a bin. Mas cu un ora di buskeda caminda a elogia Polis pa e trabou cu nan a haci.
Di mes e decision final no ta keda den man di e Polisnan cu tabata den e accion. Den oranan trempan di atardi a laga Harrypotter y e otro sospechoso liber. Fiscal a laga nan bay. Kiermen no tabatin motibo pa tene nan deteni.
Y pa atardi yamada a drenta cu tin un sospechoso den Sero Lopez cu ta drenta cura di hende. Polis a bay mesora y na yegada e persona a move. E bisiña a conta cu e homber a bin den su cura buscando un yabi cu el a perde. Esey tabata su version. Kisas ta otro cos e ta busca pasobra polis ta sospecha cu e tabatin arma cu ne aunke no por a haya nada den e vehiculo.
Concluyendo por bisa cu henter e esfuerso y inversion haci pa purba deten’e cu persecusion y peliger riba caminda tabata mas bien esfuerso pornada. El a keda mas bien na un bon training pa e polisnan cu a activa buscando un “criminal” conoci di husticia cu ya caba ta liber atrobe.
