Xiomara Ruiz-Maduro presente na recital conmemorativo dedica na Rufo Wever

Diabierna anochi Minister di Finansas, Economia y Cultura Sra. mr. Xiomara Ruiz-Maduro tabata presente na e recital dedica na Rufo Wever pa conmemora su fecha natalicio di 100 aña y 40 aña di su fayecimento.  Musico, Compositor, Arreglista: Rufo Wever tabata un compositor y musico di Aruba.

El a compone: tumba, bolero, zamba, mambo, porro, merengue, danza, mazurka, polka y calypso. Tambe ta di importancia pa menciona cu ademas di compositor, Rufo Wever tabata areglista y tur e areglonan e tabata haci su mes. Compone tabata facil pa Rufo Wever y ela composita un total di mas of menos 450, di esaki mas of menos 150 ta composicionnan completo pa piano of orkesta y 300 ta  composicionnan y areglo pa cah’i orgel. Na edad di 21 aña Rufo Wever a cuminsa cu e trabou di cah’i orgel. Aruba conoce awe na aña 2017 mas of menos 120 aña di musica di cah’i orgel, pero Rufo Wever tabata e prome persona cu a cuminsa traha e cylindernan pa e cah’i orgel na Aruba y ela haci esaki pa 33 aña.

Anteriormente e cylindernan tabata bay Corsow. E hecho aki tambe ta duna Rufo Wever un luga special den historia di musica folklorico di Aruba.
Na 1976 "Aruba Dushi Tera" un composicion di 1950 di Rufo Wever y Padu  Lampe, a ser decreta como Himno di Aruba na 1967 un couplet di Hubert Booi a wordo añadi na e himno.  E recital dedica na Rufo Wever tabata na su luga, e merece esaki y mucho mas. Un anochi yena cu nos musica cual a yena e luga cu bon ambiente. Minister Ruiz-Maduro den su maneho como mandatario y persona ta sostene, conserva y yuda promove actividadnan
cultural pa concientisa nos pueblo cu nos cultura, identidad, custumber y tradicion  primordial den desaroyo di nos como hende y nacion.