Diaranzon durante un conferencia di prensa special di gobierno Minister di Finanzas, Asuntonan Economico y Cultura, Señora mr. Xiomara Ruiz-Maduro a introduci e comision nobo Comision Celebracion Dianan Nacional.
E comision ta haci asistencia di varios departamentonan gubernamental entre otro Departamento di Obranan Publico (DOW), Cuerpo Policial (KPA), Directie Buitenlandse Betrekking (DBA), Aruba Tourism Authority (ATA), Archivo Nacional Aruba (ANA) y Directie Cultuur Aruba (DCA). E comision bao presidencia di señor John Frankin Flemming, tin como tarea pa organisa y/o coordina diferente eventonan relaciona cu celebracion di dianan nacional cu lo tuma lugar den aña 2018. Esakinan lo ta e Festival di Dande, Dia di Betico, Dia di Himno y Bandera, Dia di Rey, Dera Gay y Sinterklaas. E promer evento cu ta cay bao responsabilidad di Comision Celebracion Dianan Nacional 2018 ta e celebracion di Dia di Betico, cual e comision tin riba programa mainta e parti Protocolar y anochi e parti Ceremonia Cultural cual lo tuma lugar riba Plaza Libertador Betico Croes.
E mandatario a trece dilanti cu si nos Libertador Betico Croes tabata na bida, dia 25 di januari proximo, e lo a cumpli 80 aña. Minister Ruiz-Maduro a haci un invitacion na henter e pueblo di Aruba pa ban celebra Dia di Betico y duna nos heroe nacional e reconocimiento bon mereci. Betico ta un estadista cu a marca historia na Aruba, den Reino y mundo henter, cual te awe su trabaonan ta wordo recorda y pueblo di Aruba ta disfruta di esaki.
