Hues Comisario a prolonga detencion di e pareha Mansur awe mainta laat y awe tardi lat Fiscal mr. Schwengle a suspende e decision, pasobra a keda cla cu interogacion di e sospechosonan. E ta un opcion den nos codigo di procedimiento penal, den cual Fiscal por uza e metodo aki pa presiona e sospechosonan pasobra e tin un ordo di Hues pa prolongacion. Awe tardi despues di 6:00pm a laga ambos Izaira como Xiomara Mansur den libertad, pendiente e investigacion penal cu ta sigui awor.
Ta sospecha e pareha di a comete destruccion y a maltrata den forma simpel e homber Marshall Vinck di riba 60 aña di edad. Parce cu e ultimo aki ta comunica cu e yiu muhe di apenas 18 aña via Facebook. E mama, esta Xiomara Mansur a taha e homber di e practica aki, pero el a sigui. Ayera nan a topa cu ne den supermercado y a atende e asunto mesora. E homber a sali na careda pa su cas eybanda mes, na Opal, pero e pareha a bay su tras y na su cas a destrui un bentana. E homber a yama Polis, cu na nan turno a detene ambos y Fiscal Auxiliar a ordena nan encarecelacion.
“E cos aki tin cu stop, e no ta fair, mester yega na un solucion pe, leynan mester cambia urgentemente. Ta imposibel cu nos ta bay cera y e malhechor mes ta cana riba caya. Mayornan mester cuminsa bira activo y defende nan yiunan”, asina Izaira Mansur a bisa un rato pasa na momento cu el a sali for di Warda di Polis di Shaba. El a pasa un dia cera, acusa di destruccion y maltrato simpel di Mashall Vinck ayera na su cas na Opal, debi cu e ta manda mensahe via Facebook pa nan yiu muhe hoben.
Xiomara Mansur-Werleman a conta nos cu dos mayor a bay cera pa defende nan yiu contra un pedofiel. Su yiu muhe tin 18 aña y e meneer ta riba 60 aña di edad. “Un cos mi ta bisa Bo si, como mama, te ora cu e bati na Bo porta, e ora Bo no por bisa co Bo ta reacciona, Bo no por bisa kico Bo ta bay haci, pasobra di Bo emocion e ta sali pa defende Bo yiu”, asina el a splica. E ta lamenta cu el a splica Vicnk cu su yiu muhe tin 18 aña y cu e ta riba 50 aña mas bieu cu ne, pero asina mes e no ta tende y a sigui.
Mas leu Mansur-Werleman a sigui splica cu “Mi tin berguensa cu m’a bay cera? No, mi no tin berguensa. Pa mi yiunan, un mama ta defende su yiunan te na su ultimo rosea. Un bon mama no ta laga su yiunan na caya”. El a splica cu e proceso lo cana awo, aunke e ta sinti cu e sistema no ta sirbi, e no ta funciona. E ta haya cu si no por cambia ley, anto e ora ey mester interna un homber asina den un instituto, pasobra ta hende cu tin ideanan malo cu mucha jong. Mester cera nan eyden y tira e yabi afo pa nan no daña yiu di mama!
Xiomara Mansur-Werleman a subraya cu e ta un docente, e ta un educador y e ta orguyoso di bisa esey. “Mi ta para pa mi yiunan y mi muchanan y den mi presencia ningun hende ta bay haci daño na ningun yiu di mama”, asina el a termina bisando, memey di hopi grito y aplauso di famia, amiganan y sostenedonan.
