Durante su combersacion cu e presidente Mericano, Joe Biden, e lider Chines, Xi Jinping, a laga sa cu e metemento exterior p’e cuestion di Taiwan ta inaceptabel. E status di Taiwan, den bista di Beijing un provincia renegada, mester bolbe cay bou dominio Chines, segun Xi ta “e prome linea cora” cu Merca no mester crusa.
E futuro di Taiwan ta di suma importancia pa China y e ta un asunto interno Chines, asina Xi a informa. “Cualkier cu ta busca p’e separacion fo’i Taiwan ta viola e interes fundamental dje nacion Chines.” El a sigui bisa di ta spera cu Merca respeta esey. E reciente bishita dje politico Mericano Nancy Pelosi ta un disgusto pa Beijing.
E reunion cu a dura tres ora na Bali, e dos hefenan di estado a bay di acuerdo pa mantene e linea di comunicacion cortico. Pronto e Secretario di Estado di Merca, Blinken, tambe lo haci un bishita na China pa continua cu e combersacionnan. Segun Cas Blanco, Biden a laga sa bon cla cu Merca lo sigui competi contra China. E presidente Mericano a bisa cu e competencia aki, feroz sin precedente, no mester degenera den un conflicto y e partinan mester continua discuti. Xi tambe a bisa cu no ta trata di competi entre si, segun e medionan estatal Chines. Segun Cas Blanco, Biden tambe a saca violacion di derechonan humano na Hong Kong, Tibet y e region di Xinjiang.
Sin guera Nuclear
Pa loke ta guera na Ucrania, e dos lidernan mundial ta di acuerdo cu no mester uza arma nuclear. China tambe ta profundamente preocupa p’e situacion na Ucrania, asina Xi a bisa.
Manera a anuncia cu anticipacion, Biden tambe a expresa su preocupacion na Xi p’e provocacionnan di Noord Korea. Den ultimo tempo Noord Korea a realisa un gran cantidad di prueba di misil. Biden ta spera cu China uza su influencia riba Noord Korea isola pa persuadi e homber fuerte Kim Jong-un pa haci esey modera.
