Parlamentario, drs. Mervin Wyatt-Ras durante conferencia di prensa di partido y fraccion di AVP, dilanti Hospital, a reacciona riba e contestanan di minister Danguillaume Oduber pa loke ta trata e 33 pregunta cu e parlamentario a haci relaciona cu e cuestion di Vacuna-Gate na DVG y hortamento di placa cu turistanan ta paga pa PCR test na aeropuerto. Wyatt-Ras a haci e preguntanan pa haya claridad, pasobra den e caso di fraude na DVG tur cos ta pasa sin transparencia y Parlamento cu tin cu controla con placa di pueblo ta ser gasta, no ta haya informacion debido. Wyatt-Ras a constata, a base di e contestanan ricibi cu reaccion di minister a trece mas incertidumbre y mas necesidad pa haya aclaracion. Alabes e contestanan riba e preguntanan di Wyatt-Ras ta corto y cu un tono irita y hasta arogante.
Segun minister el a kita sospechosonan mesora fo’i trabou. Sinembargo e no a contesta ta ken e sospechosonan ta? Den boca di pueblo ta ser bisa cu ta trata di campañador di e minister.
Pa loke ta trata e preguntanan encuanto control di e certificadonan di vacuna e minister ta tira culpa riba DVG, mientras cu di e robo di placa cu e turistanan ta paga pa PCR test e ta tira culpa riba Laboratorio di Hospital. E mes ta keda ful afo. Pues e no ta carga responsabilidad. Segun Wyatt-Ras ta e minister ta esun cu mester ta na altura y ta responsabel pa tur cos.
Pa loke ta trata costo y maneho di e Health APP, minister a contesta cu esaki a keda desaroya door di DVG hunto cu SETAR NV. SETAR a desaroya e ‘dashboard application’. Locual e no a contesta ta ken ta maneha e Health App y tin acceso na tur informacion di nos hendenan.
Riba pregunta number 22, el a contesta cu no tabatin destaho publico. A djis opta pa uza SETAR. Segun Wyatt-Ras con esaki por? Tin ley di compatibilidad. Parlamento a ser informa di esaki? E minister atrobe ta insinua comosifuera ta Wyatt-Ras ta difama credibilidad, den e caso aki Setar NV.
Segun Wyatt-Ras no ta SETAR, sino DANGUI ODUBER mester ser cuestiona. E minister kier bruha tera pa e no carga su responsabilidad.
Riba preguntanan encuanto e costonan di e Health App el a contesta 300.000,- florin di cual 179.000,- ta ser cubri door DVG y e resto door di crisisfonds. Aki Wyatt-Ras ta puntra su mes: cual crisisfonds? Mester por splica pueblo esaki.
Riba e pregunta si e maneho di Health App a tuma luga den Cocolishi, e minister a contesta cu esaki ta infunda y no corecto. Wyatt-Ras como representante di pueblo mester por haci pregunta na momento cu tin rumornan ta core den pueblo y e rumornan ta esey.
Riba e pregunta con un persona cu ta registra riba Health APP ta haya mailnan den campaña pa candidato Dangui Oduber, e minister a reacciona indigna. Si ta wordo insinua cu a uza data di Health App pa campaña ta incorecto y ta tilda Wyatt-Ras di ta custumbra di e practicanan ey den AVP. Wyatt-Ras ta haya esaki un forma di defende su mes di tira culpa riba otro. Den AVP nos no ta haci tal cos y p’esey ta cuestiona e minister, segun Wyatt-Ras.
Wyatt-Ras para dilanti Hospital a duna splicacion di e proyecto di ampliacion y renobacion di nos hospital cu a inicia su mes bao di gobernacion di AVP. Un proyecto cu ta tumando hopi aña pa yega na su final. Esaki debi na e hecho cu e minister encarga cu salubridad nunca a kere den e proyecto aki y no tabata di acuerdo cu e contratista encarga pa traha riba e proyecto. Na mes momento e parlamentario ta urgi minister pa pone di su banda pa finalisa e proyecto aki pa asina tanto personal por traha den un ambiente agradabel y pashent por sosega den un bunita ambiente pa recupera mas lihe.
Pa loke ta trata preguntanan haci rond di e minister su reaccion negativo riba director di Hospital e minister a contesta cu ta remarcabel cu Wyatt-Ras cu tin voorbeeldfunctie ta di opinion cu vacuna no ta proteha. Aki e ta cuestiona con Wyatt-Ras por defende e director. Esaki no ta cuadra cu loke Wyatt-Ras a trece padilanti. Wyatt-Ras a defende e director di hospital paso el a bisa terecht cu vacuna no ta proteha suficiente manera cu tur hende a kere. Esaki basa riba e hecho cu tur e prome 17 persona cu a contagia cu Omicron tabata vacuna. E nuance aki e minister no ta mira y ni lo por mira tampoco. Natural ta keda cu e vacuna a proteha nos hendenan durante diferente pieken pa no bira asina malo y drenta den ICU, pero no por a preveni cu asina hopi hende a bira malo ora Omicron a haci su entrada. Esey tambe ta un hecho y ta evidencia. Minister Oduber mester stop di purba bira palabra di hende den su propio convenencia. Ta necesario pa e sinta na mesa cu director di Hospital pa sigui traha. Ademas en bista cu director tin COVID actualmente Wyatt-Ras a desee hopi forsa igual cu tur esnan cu tin COVID na e momento aki.
Si e minister ta papia di “voorbeeldfunctie”, kizas e ta referi na minister presidente cu ora Omicron a haci su entrada na Aruba no a worry sino toch a organisa un fiesta grandi di matrimonio sin cu minister Dangui a par’e di haci esaki. Despues di esey e casonan a pasa 1000 pa dia. Air Canada y Frontier Airlines a cancela banda di otro cancelacionnan di hotel te cu CDC a duna nos pais un red code cu lo por tin impacto grandi riba nos situacion financiero-economico y por conduci na cu mas hende lo por perde nan empleo. Acaso minister presidente lo paga pa e dañi financiero aki? E lo asumi su voorbeeldfunctie?
Mirando e contestanan pues por conclui cu nan a trece mas incertidumbre y necesidad pa haya mas aclaracion riba nan. Wyatt-Ras lo bolbe manda e preguntanan pa minister y ta spera cu lo haya contesta.
