Diadomingo mainta dia 10 di juni, Women’s Club of Aruba (WCA) a instala su directiva pa 2018 – 2019 na Alhambra Ballroom. E oficial di instalacion tabata ex-presidente Soraida Knoop, kende a haci un presentacion sublime.
Tanto e preparacion pa eleccion di un directiva nobo como esun di e ceremonia di instalacion tabata na encargo di Nomination Committee consistiendo di Mary, Emperatriz y chairman Marva. Pa e aña aki e comision a scoge como tema di instalacion Rosanan di diferente color. Rosa ta un simbolo di beyesa y fragancia, pero tambe di gracia, elegancia, amor, speransa, promesa y un comienso nobo. Cada funcion den e directiva nobo ta asocia cu un color di rosa. Asina por ehempel e bouquet di rosanan biña pa e presidente ta asocia cu “liderazgo” pa por eherce su funcion cu gracia y elegancia.
E directiva nobo di WCA pa e aña fiscal 2018 – 2019 ta manera ta sigui:
Milagros Posner (presidente), Omaira Silva (vice-presidente), Reina Geerman (tesorera), Marva Solagnier (secretaria di corespondencia), Ursly Silberie (Program Chairman), Diandra Oduber (Ways & Means Chairman), Angele Geerman (Welfare Chairman), Mily Henriquez (Study Group Chairman) y Benita Esguerra (Immediate Past President). E miembronan di WCA cu ta bay ocupa e funcion di Members at Large ta: Jeanne Ecury, Jeannette Kort y Elisabeth Pope.
Cu e instalacion aki Sra. Milagros Posner ta bira e di 84 presidente pa Women’s Club of Aruba y club ta sigui padilanti cu su lema: ‘Not what we give, but what we share’.
Presente tambe na e ocasion aki tabata representantenan di Quota Club of Aruba, Kiwanis Club of Aruba, Kiwanis Club of Palm Beach y Rotary Club of Aruba. E gran sorpresa pa e evento aki tabata ora e gran musico Ricky Kock a bin deleita tur presente cu su dushi musica, deseando e directiva nobo di WCA tur clase di exito!
