Wit Gele Kruis lo ta celebrando 58 aña cu un serie di programa

Awe ta un dia grandi pa Wit Gele Kruis, pasobra e aña aki na Juli nan a celebra 58 aña di existencia, unda cu nan ta yudando Aruba su baby y nos grandinan, como tambe nos adultonan. Pesey nan no kier laga e oportunidad aki pasa di duna nos comunidad e danki pa e sosten cu nan a haya pa 58 aña largo y tambe pa bisa cu nan tey pa yuda nos grandi y babynan, nos mucha y adultonan. Den e cuadro di esaki, ta bay ripiti un programa cu nan a ripiti na tur canal di television 3 aña pasa, na tur canal atrobe, den e simannan venidero y tambe algo special cu nan a bisa cu nan lo bay bin cun’e tambe, cu ta un programa special dedica na sr. Jan Meelis, kende ta e fundador di Wit Gele Kruis, kende a bay laga nos aña pasa, dia 21 di Mei.
WGK ta cord’e, pasobra e ta e persona kende a funda e instancia y a yuda te unda cu nan ta awor aki. Pesey ta bis’e danki pa esaki.
Gino Goeloe, director di Wit Gele Kruis, a splica cu por a mira den e delaster añanan, nos grandinan ta bira mas grandi, cual ta algo hopi bunita pa Aruba. Pero ora bo bira grandi, cierto di nan ta bin cu complicacion. Esey por a mira den e rapport annual di 2016, unda cu por a mira cu e malesa di Alzheimer ta birando mas grandi. E malesa di CVS stroke, tambe ta bira mas grandi. Esey ta nifica cu tin mas hende den cuido den e parti di cuido di hende grandi (wijkzorg) pa 2016 y 2017. Esey ta algo cu tin cu bisa comunidad, cu esey ta bay cu costo. Hopi biaha ta bisa cu den e caso aki AZV, cual ta un organisacion cu ta sigura nos tur, pero ora cu ta bira mas grandi y ta jammer pa bisa, ta bay cu complicacionnan cronico, cu presion halto, etc. Esey ta algo cu WGK ta purba di yuda tur nos grandinan cu curason, te ainda cu nan por, pero tambe ta keda na cada grandi pa cuida nan curpa y biba un bida saludabel tambe.
Manera cu semper a bisa, un bida saludabel ta un bida cu den e caso aki, mey ora di movecion pa dia ta importante. E ocho glasnan di awa pa dia ta importante y sigur pa e grandinan, baha e cuminda di vet y sucu, tambe ta hopi importante, sin lubida e salo cu tin biaha e grandinan ta gusta hopi. Pesey tin cu gradici tambe organisacion Movecion pa Bida, cu a bin cu un congreso dia 13, 14 di October, cu ta bay specificamente riba nos grandinan. Pa esey, Aruba henter mester sigur sigur bishita e congreso aki pa asina bin tende con bo por cuida bo curpa miho pa bo biba un bida mas largo. Pesey tambe e aña aki tin dos programa cu ta bay lansa, cu ta un programa riba e malesa di Alzheimer, cu ta bay cuminsa den luna di November, unda cu ta bay ilustra e malesa, kico e ta, kico e ta nifica pa un famia y ta bay laga diferente specialista papia, cuidadonan di famia, den e caso aki un yiu papia over di su mama, su tata y e tambe wijkzorg lo bay bin na Palabra, unda cu nan tambe ta bay duna algun tips, con pa cuida mama cu papa na cas, cu no ta algo facil. E ta algo hopi tristo pa bisa si, ora cu mira cu e famia ta sufri bao di e circunstancia aki.
Tambe e aña aki ta bay sigui riba e parti di “Bo curason ta den bo man”, sa cu e malesa cardiovascular ta e asesino number 1 na Aruba y pesey a ilustra dos programa caba y ta bay sigui cu cinco programa mas cu tambe fin di luna di October, cuminsamento di November, ta bay cuminsa aki na tur canal di television, unda cu ta bay un biaha mas, siña nos comunidad, educa nos comunidad, pa cuida nan curpa lo miho posibel. Esey ta algo cu segun Goeloe, pesey Wit Gele Kruis a wordo funda. El a wordo funda pa cuida nos grandinan, cuida nos babynan. Semper Wit Gele Kruis a wordo funda pa di ora bo wowo habri, te ora bo wowo cera. Pesey WGK tey p’abo y esey WGK lo keda existi pa hopi aña mas. Ya nan ta preparando pa nan celebra 60 aña di aniversario aki 2 aña. E lo bira algo grandi pa WGK mes y tambe pa Aruba tambe.

Capacidad
Gino Goeloe a expresa cu awendia tin yen di cas priva. Por conta sigur mas cu 12 cas actualmente na Aruba, sin conta SABA. A bin un ley na 2016 na vigor pa e casnan priva aki pa cuido. Sa si cu na 2017 tur cas di cuido priva a haya e ley aki. Nan a wordo splica y tin un plataforma cu ta existi, cual ta di nos grandinan (ouderenzorg), unda cu eynan a wordo treci padilanti cu e ley tey, pero ainda e ley no ta vigente. Nan no ta pas’e toe. Pasobra nan a duna tur cas priva un aña pa cumpli cu e exigencianan di e cambionan cu tin cu bin, pa e parti di siguridad, e parti di enfermeria, esta hendenan cu ta diploma y capacita pa trata cu hende grandi. Tur esey ta para den e ley. Y si tur cos bay bon, na 2018 e ley aki ta bin eigenlijk caminda cu DVG por bay na tur e casnan priva aki y bisa cu nan a haya un aña pa drecha servicio y ta mira con leu nan ta. Esey sigur sigur, sa cu ta andando y tambe pa loke ta mucha, e hobennan berdad, tin cu bay enfoca un tiki mas riba esey. Un cos si tin cu bisa, pa loke ta e mamanan hoben, ta mira cu aña pasa tabata tin 94 caso. E aña aki lo bay mira menos. Te awor aki tin 60 mama hoben te cu antayera. Y si wak e prognose, ta bisa cu e lo bay bira menos cu 94 caso, cual ta algo bon, pero un biaha mas e ta hopi ainda. Tres aña pasa e tabata 150. Awor aki tin’e na 60, te cu antayera, pero ainda e ta halto pa WGK. E ta bayendo den bon caminda. Tin cu keda educa nos muchanan. Mester keda educa nos grandinan pa den e caso aki nos adultonan biba un healthy lifestyle y e muchanan tambe tin cu bin cu mas programa, na scol y esey a cuminsa cun’e como WGK hunto cu SKOA a bin cu e programa Biba Amor, unda cu nan ta siña e muchanan den 5de y 6de klas, pa cuida su curpa. Den e parti di higiena y tambe e parti unda cu bo mester tin e diferencia entre ora cu e mucha homber ta acerca un mucha muhe y unda cu e parti eynan ta haci e mucha muhe fuerte pa e por bisa no, den cierto casonan y vice versa. Awendia tin cu wak tur dos banda. Esey ta programanan cu a cuminsa cun’e na 2013 y el a cuminsa na 2014. E ta den e bankinan di scol di SKOA. No tur scol. Awor aki e ta bay bira 12 scol y a lo largo e ta bay na tur scol di SKOA. Tambe ta trahando riba esey cu e programa di Biba Amor. Tin cu sigui traha riba mas programa y esey WGK ta keda enfoca riba tur cos cu tin eyfo cu ta un problema, cu ta gar’e cu dos man y traha plan pa combati e problema aki pa haci’e menos. Pesey WGK a wordo funda tambe, pa cuida nos grandi y nos muchanan.

Den bon caminda
Si ta bon, DVG tin un departamento di nos grandinan, unda cu sra. Leni Geervliet ta hefe di e departamento aki y e ta e persona, hunto cu su team, den e caso aki, ta esnan cu ta bay controla tur e casnan priva aki riba locual ta para den ley. Ta trata aki di higiena, educacion di e personal, cu mester tin personanan cu tin experiencia den enfermeria. Actualmente tin yen di e casnan aki, no tin e enfermera of broeder cu ta traha capacita cu e grandinan y WGK ta bisa cu no por. Enfermeria ta un educacion di cuater aña. Tin diferente nivel tambe pa cuida e hende grandi. Cuida hende grandi zomaar no ta bay asina. Bo mester tin e conocemento, e educacion kico ta remedi, kico ta efectonan di remedi, kico ta presion halto, kico mester haci ora cu un hend e haya atake di curason. Tur eseynan ta algo cu mester sa. Y esey ta algo cu WGK a para pe y a bira un ley. Awor aki sigur sigur tin cu bay wak si e casnan aki berdaderamente ta cumpli na e exigencianan aki. Pesey DVG mester haci su trabao pa otro aña. Sa si cu tin diferente cas cu a wordo bishita durante e aña 2017 y tin algun cas cu tin algun cos pa drecha ainda.