Dia 28 di Juli, Wit Gele Kruis ta cumpliendo 60 aña. Pero a haya ta bon pa cuminsa for di awo caba pa duna pueblo di conoce ken ta Wit Gele Kruis. Y e 60 añanan aki tin hopi historia su tras.
Director di WGK, Gino Goeloe a splica cu nan ta un fundacion cu a wordo funda pa soeur y pastoornan catolico na Hulanda na 1930 y e meta tabata pa cuida hende pober malo, loke Wit Gele Kruis ta haci te dia di awe.
Nan ta cuida, baby, nos grandi y adultonan. Pesey tin cu bisa cu danki na tur e soeurnan, tur e enfermeranan, tur dokter cu ta pensiona na cas, danki na nan cu WGK ta asina leu.
WGK durante e añanan, a crece bira mas grandi. Pesey Goeloe a menciona cu tambe ta wak cu salud di nos comunidad toch, no ta e manera cu WGK ta desea. A haya rapportnan unda cu ta indica cu na Aruba ta uzando 500 miyon florin pa aña den salud, algo cu ta hopi halto pa un isla chikito di 110 pa 120 hende.
Aruba ta e di tres pais mas caro na mundo den e parti di seguro y esey toch ta un preocupacion. WGK a cuida nos babynan cu e vacuna cu ta duna nan, te na e cuido di nos ancianonan, e cuido di kraamzorg. Tambe tin e parti di mayor firme y tambe tienermoeder.
Goeloe a sigui bisa, cu toch ta preocupa pa e salud di nos comunidad y pesey kier bisa Aruba cu tin cu bay haci algo na esey. Ta wak hopi hende ta moviendo actualmente na Aruba, canando tur caminda, pero tin cu haci algo mas pa esey. Door di esey a bin cu e idea cu ta bay bin cu un programa pa embes di bisa “pasa un dushi dia”, of “bon dia”, kier bin cu e slogan di “pasa un dia saludabel”, of “pasa un dushi dia saludabel”. Esey ta bay accentua e salud. E ora ey e ciudadano por puntra, kico e persona kiermen cu salud. WGK kier sigui move e comunidad pa nan sigui move. Tur instancia cu ta haci programa di salud manera cushina of otro programanan cu ta pone hendenan move, mester bisa danki na nan tambe pa sigui pone enfasis pa laga nos comunidad move, laga nos comunidad bira saludabel y pa asina ey tin un bida salud. Esey ta algo cu WGK ta kere aden y keda pone enfasis riba e parti aki.
WGK ta bay tin mas programa cu ta bay pasa na television di WGK tocante salud. Ta bay tin parti di historia di WGK na television y na radio. Keda pendiente. Esaki ta e comienso di e celebracion di 60 aña sirbiendo comunidad di Aruba.
Rol di comunidad
Segun Goeloe, tin dos cos cu e ta wak, cual ta e parti cu Gobierno mester hinca mas placa den e parti di prevencion. Ora cu mira e rapportnan cu e tin di e 500 miyon eynan, solamente 3% ta bay den prevencion y 50% ta bay den e prevencion y 50% ta bay den e parti curativo. Eynan WGK ta boga pa bay mas placa den e parti di prevencion. Educa nos muchanan na scol, educa nos muchanan cu programanan na television, bin cu programa di cushina, prepara cuminda, movecion, cosnan cu ta hiba nos comunidad pa biba un bida saludabel. Eynan Goeloe ta kere cu e accent mester ta cu mester bay hinca mas placa den prevencion. No mester laga pa e parti curativo, pero tambe pa e parti di prevencion y tambe e parti di cuido. Eynan tambe por mira cu falta di mas placa den e parti di cuido tambe, pa nos hendenan grandi.
