Aruba Airport Authority N.V. awe a anuncia na e participantenan di e bid pa maneha e terminal FOB – General Aviation di Aeropuerto Internacional Reina Beatrix, cu e compania Windsor Jet Management a sali e ganado y cu entrante 1 di januari 2018 nan lo tuma maneho di e terminal over.
Manera ta conoci, e concesion di Universal Aviation Aruba, cu ta e compania cu ta manehando e terminal di avionnan priva, ta termina dia 31 di december 2017. A organisa un bid den cual varios compania, local y internacional, a mustra interes pa maneha e terminal. Na un prome instante aeropuerto a bisa di lo contesta dialuna dia 18 di december 2017, pero no a logra keda cla sino te awe diahuebs dia 21 di december, faltando apenas 10 dia pa e contact cu Universal Aviation Aruba vence.
Ignacio Martinez ta CEO di Windsor Jet Management y na Aruba e ta liga cu un otro compania local cu ta haciendo trabou caba na aeropuerto. El a haya publicacion ora algun siman pasa el a biaha den su avion priva, cu matricula N-218-RX, pa Fort Lauderdale hunto cu Minister Otmar Oduber y Gigi Helder, hunto cu nan señora. Riba su mes esey no ta nifica nada, pero e ta crea duda ora un compania cu ta den pleno contienda pa gana un destaho publico for di Gobierno, ta biaha cu un Minister den un avion priva. E ta lanta interogatorio si e mandatario a paga of e tabata un regalo (pornada) cu e ta biaha priva cu su señora den e avion. Awor cu e mesun compania a gana e destaho, e interogatorio aki ta percura pa mas pregunta ainda!
Mientrastanto Universal Aviation a manda su trahadonan cas cu un pakete. Por lo menos 10 no a acepta e pakete y a bay purba nan suerte den Corte. Nan a gana e caso y e compania a haya nan ta paga e grupo aki dobel di locual nan a ofrece nan na un prome instante.
Lamentablemente Aruba Airport Authority N.V. mes ta manteniendo un secrecia enorme rond di e proceso aki di destaho y incluso awe a nenga di contesta ken a gana e destaho. E forma di anda aki cu informacion ta cuestionabel, specialmente pasobra ta trata di un compania priva, pero di Gobierno, cu mester por ta mas transparente posibel.
Windsor Jet Management ta un compania di “global aviation” specialisa den charter di avionnan, den maneho di companianan di aviacion y adkisicion di avionnan. Nan ta situa na Fort Lauderdale, na Merca. Nan tin un flota di mas cu 20 avion y tin mas di 100 empleado den servicio directo.
