Den luna di yüni 2019 tabatin reunion di diferente komishonnan pero tambe elekshon pa un direktiva nobo pa Parlatino. Nos a asistí komo miembro di e komishon di Servisio Públiko i Defensa di usuario i konsumidó pero tambe komo vice-presidente di e komishon di Equidad di genero, Niñez i Hubentut.

Promé ku komishonnan kuminsá ku nan trabounan tabatin un akto di instalashon di pa asistensia na reunionnan i asamblea number 35 di Parlatino. E akto di instalashon aki a ser dirigí pa un mesa di direktiva. Pa e okashon aki sr. Wimbert Hato a ser nombra komo miembro di e mesa direktiva pa hasi e instalashon ofishal.

E mesa di direktiva ta duna un resultado di e trabounan di e komishonnan den e tres lunanan ku a pasa i kua te típikonan ku lo ser trata durante e reunionnan e biaha aki. Tambe a duna informashon tokante e elekshon di direktiva nobo di Parlatino i kiko por spera . A informá tambe ku e aktual presidente sr. Elias Castillo lo tin ku baha komo presidente debí ku su partido a pèrdè elekshon i e no ta parlamentario mas pa 1 di yüli 2019. Despues di instalashon kada komishon a kuminsá ku nan reunion.

Etikèt riba produktonan ku por yuda spar koriente.
Tur pais miembro ta konfrontando e mesun problema esta ku kosto di energia ta hopi haltu i ta birando mas karu. Ta di opinion ku mester buska un manera pa spar energia dor usa ménos koriente. Un di e formanan ta pa kontrolá kua ta e produktonan ku ta ser usa riba nan merkado prinsipalmente merkado di produktonan manera frishidèr, èrko, wasmashin, toaster i otro aparatonan elektróniko. Mayoria pais tin lei ku ta eksigí ku riba produktonan alimentisio mester tin etikèt ku ta bisa kiko e produkto ta kontené i te ki fecha por us’e. Pero esei no ta e kaso pa produktonan elektróniko. Si esaki ta e kaso mes riba algun produkto, ta pasobra e la ser importá di un pais ku si tin e eksigensia ei. A deliberá ampliamente kon por bin ku proposishonnan ku por regulá esei den Latino Amérika pero tambe den Caribe. Di parti di Kòrsou nos a mustra ku enberdat nos tin lei manera Warenlandsverordering, etikettering van levensmiddelen, bestrijdingsmiddelen van schadelijke dieren en planten ku ta mustra kiko ta indikashon ku mester tin riba etikèt di kos di kome i kos di bebe, material pa pa kombatí plaga i yerba malu pero pa loke ta produktonan elektróniko òf ku ta konsumí energia esaki no ta spesifiká pa nos leinan. Kada miembro a informá kon e situashon ta den su pais. Algun ta di opinion ku hasta riba produkto di konsumo e etikèt mester ta mas spesífiko por ehèmpel indikashon di Gluten òf no ya ku sientifikamente a ser proba ku esei ta hasi daño na hendenan outista i a kombení ku den e próksimo reunion lo bin un proposishon final kon ta bai formulá e konsiderashon òf proposishon di un lei na hunta di direktiva di Parlatino.

Protekshon di dignidat privasidat i honor di kada persona atrabes di retnan sosial.
Dor ku e tema ta hopi kompliká e komishon a disidí di partié den diferente sub- tema manera; lei ku ta atendé ku akseso i demokratisashon di internèt, lei pa protekshon di dato personal, lei di protekshon di dignidat i honor di kada siudadano ku ta usa retnan sosial i fakenews. A disidí pa atendé dos punto den e reunion aki ku ta lei di protekshon di datonan personal i notisia falsu riba retnan sosial. A kunbiní ku kada miembro lo trese dilanti e situashon ku tin den su pais. Pa loke ta Kòrsou nos a informá ku nos tin un lei ku ta garantisá protekshon di datonan personal di kada siudadano e asina yama Landsverordering bescherming persoonsgegevens i a duna splikashon di algun di e artíkulonan ku tin para den e lei. Tambe nos a presentá un proposishon ku tin pa introdusí e reglanan di GDPR ku ta konta pa Union Europeo den region di Caribe i posiblemente latino Amérika tambe ya ku den futuro lo tin eksigensia di Union Europeo ku si bo no ta kumpli ku e kondishonnan ei lo bo no por hasi negoshi ku Union Europeo prinsipalmente pa loke ta trata aviashon i krusero,. Nos a entrega e dokumento tokante introdukshon di di GDPR i a keda ku lo tradusié i mand’e pa tur miembro pa atendé den e siguiente reunion.

Fake news. Notisia falsu riba retnan sosial a kue un rumbo inkreibel. Hopi daño ta ser hasi riba tur tereno riba persona, riba organisashon, riba negoshi i dimes riba partido polítikonan. Tur hende ta konkluí atrobe ku un instrumènt ku a ser inventá I diseñá pa bon intenshon ta ser usa pa finnan ménos bon ku e meta pa hasi daño i hasta tin biaha krea pániko den un sosiedat. Prinsipalmente durante di kampaña elektoral ta sali masha hopi notisia falsu ku fin di difamá otro òf partidonan mas tantu posibel. Den kuadro di esaki representantenan di Uruguay a trese dilanti ku den pais nan a logra ku tur partido den e último elekshon ku a tuma lugá ta firma un pakto étiko huntu ku prensa di e pais. E pakto ta pa hiba un kampaña limpi sin hasi uso di notisia falsu, pues fake news, pa perhudiká ningun atversario. Tambe nan a palabra ku partido polítikonan lo eduká nan miembronan kon tin ku usa retnan sosial di un manera limpi di Buena fe sin wega sushi. A palabra ku lo trese e pakto komo un ehèmpel durante e asamblea di Parlatino ku a tuma lugá djabièrnè 14 di yüni 2019 ku e petishon pa tur pais tuma esaki komo ehèmpel. Esei a ser hasi tambe. Tambe a papia tokante posibilidat pa lanta un un instansia ku tin ku detektá i aktua kontra notisia falsu aunke tur hende tabata di akuerdo ku esei ta un tiki difísil i ku hopi biaha ya e daño ta hasi kaba. Loke tin ku hasi ta eduká e sosiedat tokante e daño ku esei ta hasi na e propio sosiedat i pa no generá ni promové notisia falsu esta fake news.
A papia tambe tokante akseso na servisio públiko manera awa, skol, salubridat, asistensia sosial dor di pueblonan indígena den Latino America. Ainda tin hendenan ta biba sin e servisionan aki i un komishon otro a pidi otro komishonnan pa trata e punto aki komo un punto transversal es desir pa tur miembro di Parlatino pone atenshon p’esaki I kon por aportá ku solushon.

Crypto moneda plaka digital. Diferente pais ta haña nan konfrontá ku introdukshon di crypto-moneda o sea plaka digital. E tin su bentahanan i desbentahanan. Un di e desbentahanan ta ku bo no tin kontrol riba dje I ku e no ta paga impuesto na ningun pais sino ku no ta ora konbertié den plaka regular. Tin pais ku ya kaba binti porshento di nan ekonomia ta ser forma pa plaka digital ku konsekuensia ku nan no ta haña e kantidat di impuesto ni tampoko entrada di primanan sosial, ku konsekuensia ku nan struktura di provishonnan manera penshun, salubridat I otro provishonnan sosial ta na peliger. Banda di esei ta eksistí un temor ku e por ser usa fásilmente pa labamentu di plaka. Bankonan sentral tin poko pa no bisa niun kontrol riba transakshonnan. Loke a Sali dilanti den e reunion ta ku paisnan pero sigur miembronan di Parlatino no tin sufisiente saber ni informashon tokante plaka digital i for di e komishon a sali un petishon

pa Parlatino organisa un foro e invita IMF, Worldbank i SEPAL pa bin duna informashon tokante plaka digital.

Elekshon di un direktiva nobo pa Parlatino.

Durante e asamblea number trintisinku di Parlamento Latinoamericano y del Caribe mester a eligí un direktiva nobo pa Parlatino ku tin di sinta dos aña. Enbista ku e presidènt saliente sr. Elias Castillo di Panama no a ser re- eligi komo diputado den su pais e no tin derecho di keda den puesto di presidènt di Parlatino por konsigiente mester eligí un direktiva i di mes un presidente nobo. Dor di ku hopi pais tabatin elekshon resientemente tabatin hopi miembro representante di e paisnan nobo i nan tabata eksigí un kambio den henter direktiva. Tambe tabata eksihí representashon mas grandi di e region Caribe den e direktiva. Den kuadro ei sr. Wimbert Hato di Kòrsou a ser postulá komo kandidato pa drenta hunta di direktiva di Parlatino. Tabatin hopi kandidato. Na final despues di hopi lobimentu a presentá un plancha ku a ser aseptá ku e resultado ku sr. Hato no a ser eligí. Pero e solo echo ku un miembro di Kòrsou a ser aserka pa postulá ya ta un rekonosementu. Na final e direktiva nobo a ser eligí pa aklamashon nombrando sr. Jorge Pizarro di Chile komo e presidente nobo pa Parlatino. Durante di e Asamblea a instalá pais Qatar i Maroko komo miembro opservador di Parlatino huntu ku China I Rusia.

Adaptashon di kalendario di Parlatino. Komo ku den luna di òktober tin elekshon den diferente pais den Latino America durante di e reunion general di tur komishon a bin e petishon pa adaptá e kalendario di Parlatino. A proponé pa tur e reunionnan di òktober pasa pa sèptèmber òf novèmber mas ainda ora tin petishon pa atendé diferente tema den reunionnan transversal es desir pa dos òf mas komishon reuní pareu riba un típiko. Direktiva di komishonnan lo bai atendé esaki. Aruba a ofresé pa ta sede otro aña pa reunion di algun komishon i direktiva lo bai traha riba esaki.
Reunion ku representantenan di Asamblea Nacional di Venezuela. Durante di e reunionnan nos a sostené huntu ku Andy Croes i Daphne Lejuez di Aruba un reunion ku diputado sr. Julio Montoya I dos representante mas di Asamblea Nacional di Venezuela. Nan a konta nos di diferente situashon penoso ku nan ta pasando aden i ku asamblea es desir parlamento no por reuní pasobra polis ta gana ku tin bòm den parlamento òf ta esena dalmentu fiktisio di outo rondó di parlamento di manera ku nan no por drenta pa reuní. Tambe na ke papia ku nos parlamento tokante diferente tema di interes manera e refineria, kon Citgo merikano por yuda, imigrashon di Venezolanonan I otro tópikonan. Nan ke hasi un bishita na Kòrsou pa papia ku parlamento sin ningun obligashon. Tantu Aruba komo nos di Kòrsou a splika nan ku nan mester manda un karta ofishal pa Parlamento di Kòrsou I despues nan lo haña un kontesta di kiko ta posibel òf no.
Esaki ta kòrtiku asina un relato di di reunionnan i tópikonan ku a ser atendé durante di e di trintisinku asamblea di di Parlatino ku a ser tene resientemente.

Asistensha na Parlatino. Konstantemente tin diskushon I remarke tokante biahe di parlamentarionan pa Parlatino. Prinsipalmente ku a e kritiká ku nan ta gasta sèn. Kontakto ku mundu eksterior ta sumamente importante prinsipalmente ora bo ta biba riba un isla. For di mas ku kuarenta aña nos pais ta miembro di
Parlatino. Meta di Parlatino ta promové demokrasia parlamentario, pa paisnan den latino Centro America i di Caribe reuní kada tantu tempu pa atendé problemanan komun, pa interkambiá di idea, pa atendé posibel leinan ku por introdusí den nan respektivo pais, pa atendé loke ta sosodé den region i tambe pa network es desir hasi kontakto ku despues por ta di konvivensia pa respektivo pais. Tur partido ku bai elekshon i saka asiento den parlamento tin derecho pa apuntá unu òf mas miembro den Parlatino, ku lo asistí na nòmber di su partido i parlamento. Komo pais bo ta haña derecho riba sierto funshonnan den komishonnan manera presidente i vice-presidente di komishon i tin chèns hasta den direktiva grandi di Parlatino. Honorable sr. Ricardo Elhage di nos pais Kòrsou ta un ehèmpel grandi ya ku pa un tempu e tabata presidente di Parlatino. Komishonnan ta reuní 3 biaha pa aña. Partisipá na e reunionnan ta parti di trabou di e parlamentario. Nos ta komprondé e kritiká pasobra no ta na Kòrsou so sino kasi den tur pais tin reklamo riba biahamentu di mandatarionan pero keda sin partisipá lo isolá bo pais. Meskos ku un kongreso, un workshop òf un reunion di kualke kompania òf negoshi un reunion di Parlatino no ta duna bo resultado mesora pero lo e por yuda si den futuro.

Esaki mas si nos tene kuenta ku e temanan ku ta ser trata durante reunionnan di Parlatino ta di interes general i por risibí komo base pa preparashon di puntonan hopi importante ku Parlamento di nos pais ta tratando manera: Migrashon, desempleo bou di hubentut, konsumí di energia.

Comments

comments