“Mi kier bisa Otmar, cu e por mira cu e ta para dilanti Ministerio Publico aki. Cu mañan ora e drenta, mi ta spera cu e por sali bek. Pasobra locual cu nos tin, ta hopi, ta suficiente y ta tristo pa sa cu un Gobierno a wordo forma cu un delincuente, un bandido…cu tur hende sa. Otmar cu e Gobierno completo, cu mi mes a pone, a perde caso contra mi caba y no a bin nunca mas”, asina Michael Williams di Fundacion Nos ta Aruba, a bisa un rato pasa para pafo di Ministerio Publico situa den Rumbastraat.
Williams a bisa cu e ta cla pa tur cos y no tin miedo di Oduber. El a corda e ex mandatario cu si Evelyn Wever y Xiomara Maduro tin miedo di dje, ta nan cuenta. Pasobra e ta manda den Gobierno y ainda e ta “wheel and deal” tur caminda.
Pero pa awo e tin un mensahe pa e lider di POR. “Bay unda bo kier, pero Bo fiesta a caba y aki nos ta bay sin miedo!” E ta convenci cu ora Oduber bay OM mañan pa entrega keho, cu e chens ta grandi cu ta want’e eyden. El a corda Oduber cu el a yega di hib’e Corte un biaha caba y a perde e caso, pues e ta bonbini pa purba un biaha mas.
