Willemstad ta kumpli 22 aña komo Patrimonio Mundial di UNESCO

95

Awe 4 di desèmber 2019 Willemstad ta kumpli 22 aña komo Patrimonio Mundial di UNESCO. E asignatura di e sentro di suidat komo patrimonio mundial a tuma lugá na Napoli Italia den un komishon speshal di UNESCO.

E komishon di patrimonio mundial di UNESCO ta un grupo di eksperto internashonal. Na 1997 e komishon aki tabata di akuerdo ku e balornan monumental di e parti históriko di Willemstad ta asina importante ku mester konservá esakinan pa henter mundu. E motibu ku a nombrá Willemstad komo siudat di Patrimonio Mundial tabata ku e desaroyo durante 300 aña siguí di historia ta asina representativo den arkitektura, hanchinan, historia i arkeologia.

Huntu ku e balornan monumental, Gobièrnu di Kòrsou mester a prueba ku e tabata tin un sistema di maneho i leinan ku ta garantisá ku e balornan aki ta keda eksistí i protehá. Pa e motibu aki, a lanta institutonan manera “Monumentenraad”, “Monumentenfonds”, “NV Stadsherstel”. Tambe a traha riba maneho di monumento, lei di monumento, i Kòrsou su ‘Eilandelijke Ontwikkelings Plan’ (EOP). Den EOP tin e artíkulo ku a nombrá henter e sentro di siudat komo un siudat protehá. Atraves di esaki, a konservá edifisionan i e manera ku e siudat ta planifiká.

E parti di nos siudat protehá ta kuminsá for di Hamelbergweg na altura di Banco di Caribe den Otrobanda te Berg Altena na altura di e lusnan di tráfiko. Parti sùit ta te na laman i e parti nort ta te na brùg Koningin Juliana.

Pa Willemstad keda riba e lista, e tin ku kumpli ku kriterionan di UNESCO. Kada 6 pa 8 aña ta hasi un evaluashon ofishal di esaki. Kòrsou tin ku restourá su monumentonan na e forma korekto, tambe mester sòru ku edifisio nobo den sentro di suidat ta konforme e reglanan den EOP, i mester hasi lo máksimo pa e monumentonan aki no dekaí i/òf kai den otro.

Na dos okashon, Gobièrnu di Kòrsou a atendé ku UNESCO pa edifisionan nobo den sentro di siudat ku tabata tin un impakto grandi. Esaki tabata dia a konstruí Banko Sentral na Skalo, i dia a konstruí hospital nobo den Otrobanda. Tur dos biaha esaki a resultá bon pa Kòrsou.

UNESCO mes ta kontrolá kiko ta pasa den áreanan asigná komo patrimonionan mundial. Tambe e por disidí ku e ta bai vigilá e área di aserka pa e pais kumpli ku sierto aspekto. Tambe por disidí ku temporalmente ta kita e suidat for di lista i pone e patrimonio riba un lista di patrimonio na peliger. Na dos okashon a kita áreanan òf suidatnan for di e lista di patrimonio mundial kompletamente for di lista di UNESCO. Tur aña ta bin mas kaso kaminda ta disidí ku Gobièrnunan mester atendé mihó ku nan patrimonio.  Ta importante pa Kòrsou kuida su siudat komo Patrimonio Mundial di UNESCO.

Un propietario di un monumento mes por kuida su edifisio. E tin ku:

  • mantené dak i hit (‘goot’) den bon kondishon;
  • kontrolá kada 6 luna pa limpia e hit kitando blachi di palu i sushi pa awa por kore bai mas fásil,
  • drecha e skernan den hit pa evitá ku awa ta drenta den e muraya,
  • kontrolá un bes pa aña si e panchinan di dak ta bon na lugá,
  • kontrolá ku regularidat presensiá di komehein i/òf palu ku a putri den bisindario di e hitnan.

Minister Zita Jesus-Leito huntu ku Servisio pa Planifikashon Urbano (ROP) ta felisitá Kòrsou ku Willemstad su 22 aña riba lista di patrimonio mundial. Tambe ta urgí tur doño di monumento protehá i no-protehá pa kontrolá i hasi reparashon nesesario na nan edifisio. Huntu ta kuida e sentro di siudat, e monumentonan protehá i esnan no-protehá.Pa pregunta general por tuma kontakto ku ofisina di ROP via e number 433-3200 òf por aserka nos via e-mail na [email protected].