Pronto Wilhelmina Kankerfonds lo bay tin su rifa grandi. Y abo, como ciudadano por ta parti di e sosten cu bo por duna na Wilhelmina Kankerfonds, cu ta traha pa decadanan largo, yudando hopi famia cu ta pasa den situacionnan fastioso cu nan ta pasa aden pa motibo di cancer. Cumprando un ticket bo por contribui.
Segun presidente di KWF, diadomingo, dia 2 di September, e rifa lo tuma luga pa 6’or y 45 na TeleAruba, dilanti di notario Yarzagaray. E premionan ta fabuloso. Esaki ta pa di tres aña cu nan ta haci’e. E ta bon pasobra e ta yuda e organisacion. Aña pasa a recauda 29 mil den luna di April y Mei. E aña aki el a yega 75 mil. Pero ora cu mira e prome seis lunanan di 2018, ta mira con e gastonan tabata. Manera semper ta bisa, e gasto di mas grandi cu KWF tin na e momento aki, ta esun di cuido na cas. El a surpasa caba su 60 mil. Ora cu bo bin mira cu ta bin acerca e yudansa cu ta duna di pasashi, cu tambe a yega e suma halto caba, tin un gasto sigur sigur caba cu ta yegando den 70 mil. Es decir, loke cu a colecta den luna di April y e dos prome simannan di Mei, ya caba practicamente esey ta bay.
Nan ta haya, manera cu comunidad ta sigui tur e eventonan, donacionnan. Esey ta bay pa otro gastonan cu tin, manera pa personanan cu ta yega na KWF, na e momento di pidi un sosten. Tur yudansa cu KWF ta duna, danki na Dios y tambe na e comunidad Arubano, e ta completamente gratis pa esun cu ta bati na porta di KWF.
Pesey un biaha mas, Prins ta pidi pa sostene KWF cu e rifa aki. Otro siman nan lo ta habri te cu 6’or di atardi, pa asina ey por sigui bende e rifanan. Na Cura Cabay Lotery por haya e rifa aki tambe. Si bo ta riba caminda grandi pa bay ariba, of biniendo abao pa bay Playa, por pasa aki pa cumpra e rifa aki.
Costo di rifa
Costo di e rifa aki ta 25 florin. Tin hende cu ta bisa cu ta hopi placa. Pero bo tin 10 premio. E 10 premionan cu tin.
Un auto marca KIA 2018, dos pasashi pa Amsterdam, Hulanda. Dos ticket di un mystery travel cu bo por scoge cortesia Maduro & Sons. Ta bay tin cuater premio di 1000 florin si SETAr, Superfood y Caribbean mercantile Bank. AMC Unicon lo tin un airco di 12 mil BTU Inverter, Boolchands, cu lo bay ta un aparato sofistica di e marca Bose, cu tur hende gusta y tambe Premio di Ling & Sons, cu ta 250 florin cu por gasta na comestibles.
Ta premionan fabuloso
25 florin pa hopi pa otro hende, pero ora cu KWF saca 2000 y pico florin den un pasashi so, e ora ey bo ta mira cu e 25 florin, bo ta colaborando cun’e. Bo ta yudando un persona den e comunidad aki via di KWF pa e por yega cerca su sernan keri.
Contacto
Ta facil pa tuma contacto cu KWF. Por yama Lily Prins na number di telefon 5937227 y e ora ey e rifa ta wordo treci p’abo na cas.
