World Health Organization (WHO) a declara e emergencia internacional pa coronavirus di Wuhan. Director general di e organismo, Tedros Adhanom, bao di recomendacion di e Comite di Emergencia a decreta diahuebs cu e brote di pneumonia cu epicenter na China, ta constitui un Emergencia di Salud Pubico di Alcance Internacional (PHEIC).
E declaracion di e categoria di maximo alerta pa un crisis sanitario ta yega despues cu roconavirus 2019-nCoV a traspasa e fronteranan di e continente Asiatico y e cantidad di casonan registra den diferente pais a aumenta y hasta afecta 7700 persona.
Te asina leu, ya ta 170 persona cu a fayece, tur di nan na China, unda cu tin casonan confirma den tur e regionnan.
E transmision di coronavirus di hende pa hende ta preocupa autoridadnan sanitario. Un siman pasa, e comite forma pa 15 expereto medico di diferente pais a descarta pa declara e alerta internacional ora cu a considera cu e emergencia tabata focalisa na China y a haci un yamamento na calma. Director general di WHO a aclarea e ora cu e decision no tabata nifica pa no pensa cu e situacion no tabata “grave” y a mustra cu speransa cu e medidanan tuma pa autoridadnan Chines, manera aislamento di ciudadnan completo manera Wuhan y vecindario, lo tabata eficas pa contene e pidemia. Finalmente no tabata asina.
Diaranson mes, Adhanom a reconoce e preocupacion di WHO ante e progreso di e virus den e ultimo dianan, “specialmente e transmision di hende pa hende.” Pa WHO decreta e categoria maximo di alerta pa un crisis sanitario, mester existi un circunstancia extraordinario cu riesgo di propagacion rapido pa otro paisnan y cu ta exigi un respuesta sanitario internacional coordina.
PHEIC lo a supone na intensifica e medidanan preventivo na nivel global, como tambe e coordinacion sanitario pa homogenisa e procedimentonan di prevencion, cuarentena, tratamento y hasta conscientisacion riba e epidemia.
E brote di Ebola, e ultimo emergencia internacional sanitario
Coronavirus 2019-nCoV ta comparti un 80% di similitud cu e virus di e sindrome respiratorio agudo y grave (SARS), cu na 2003 a afecta na mas di ocho mil persona y a provoca morto di 774 persona, principalmente na China.
Ultimo biaha cu WHO a declara e tipo di emergencia aki tabata na Republica Democratico di Congo pa e brote di Ebola na juli di 2019. E alerta tambe a activa na 2016 pa e virus zika, na 2015 pa polio y pa Ebola na Africa Occidental y na 2009 pa e brote di griep H1N1.
