E pandemia di COVID-19 ta awor aki na un momento critico specialmente den e hemisferio nort, cu e aumento fuerte di caso den zonanan manera Europa y e proximo lunanan “lo bay ta hopi duro”, director general di e Organisacion Mundial di Salud (WHO), Tedros Adhanon Ghebreyesus a adverti awe.
“E tendencia den hopi pais ta peligroso, cu hospital y unidadnan di cuido intensivo yegando na nan limitenan di capacidad of pasa esaki, y esey cu solamente nos ta na october,” e experto Etiopi a adverti den su ultimo rueda di prensa di siman.
Em bista di e actual combinacion di factor, Tedros a pidi e lidernan politico pa “tuma accionnan inmediato pa evita mortonan innecesario, y pa no tin mester di limita movemento y cu scolnan por sigui ta habri.”
“Manera cu mi a bisa na februari, esaki no ta un simulacro,” e maximo responsabel di WHO a alerta, pa recomenda cu e gobiernonan tene hopi na cuenta cu e datonan di e pandemia den nan paisnan na ora di tuma decision.
El a añadi cu e rednan sanitario unda cu e cantidad di hospitalisacion y casonan grave ya ta halto “mester cuminsa haci e ahustenan necesario” y a afirma cu den tur e casonan “ta importante ta sincero cu e poblacion, splica nan loke nan tin cu haci y cua ta nan situacion actual.”
El a enfatisa cu hasta gobiernonan cu a logra controla e avance di coronavirus “mester redobla nan esfuersonan.”
“E proximo lunanan lo bay ta hopi dificil,” Tedros a insisti, kende tambe a indica cu den caso cu e poblacionnan tin cu ta aisla “e gobiernonan mester haci lo posibel pa yuda nan, y pa nan negoshi por ricibi apoyo.”
Tedros a sigura cu un bon maneho di aislamento di casonan “por evita confinamentonan obligatorio,” y a conclui señalando cu “nunca ta laat pa autoridadnan por dal buelta na e situacion.”
Europa a delanta zuid di Asia den cantidad di caso cu 8,8 miyon y e cifranan di e cantidad di caso nobo tur dia ta aumenta rapidamente, subiendo actualmente cerca di 200 mil, e mita di henter e planeta y casi shete biaha mas cu den e pik di e prome ola na maart y april.
E mortonan den e Continente Bieu tambe ta subiendo y ya nan ta rond di 2 mil pa biaha, aunke e cifranan ainda ta menor cu esunnan di maart y april, ora cu nan a alcansa e maximo di hasta 5 mil fayecimento diario.
Autor: JEAN-CHRISTOPHE BOTT
