Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba veld di Dragon Hitters cu un tremendo ambiente y un bar y cushina bon surti. Den categora A-Klas e dos ekiponan primo-ruman White Joker y Black Joker a enfrenta otro.
White Joker cu a inicia campeonato tambaleando poco poco a coy su ritmo y a logra derota e ekiponan na prome y di dos luga. White Joker ta anota 3 careda den prome inning y ta amplia cu 1 careda den cabes di 4 inning. Henk Arnold solido riba minticulo a pone 3 lamunchi den e prome 3 inningnan. Den bom di 4 inning Black Joker ta corta bentaha cu 1 careda pa haci e wega 4-1.
Den cabes di 5 inning White Joker ta amplia cu 4 careda pa haci e wega 8-1. Den bom di 5 inning Black Joker no kier entrega y ta rally yuda cu 5 eror pa anota 6 careda y ta yega cerca 8-7. Henk sinembargo ta preta brasa di e poco cu a keda pa asina piki un victoria importante pa su ekipo. Boxscore final White Joker 8 careda, 8 hit, 9 eror cual tabata e cantidad di eror di mas halto pa un wega den e temporada aki y ta laga 5 coredor na base. Black Joker 7 careda, 7 hit, 4 eror y ta laga 8 coredo den circulacion.
Miho bateadornan pa White Joker ta Roderick Angela 2-1, Rajiv Cornelio 3-2 incluyendo un triple cu 2 careda anota y 1 rbi, Jhoan Ruiz 2-2 cu 2 anota y 1 rbi, Sandrick Wester 2-1 cu un doblete, Mario Kock y Arsan Wester ambos di 3-1. Pa Black Joker a destaca na plato Oslin Bergrok 3-2 incluyendo un homerun mas 2 rbi, Roderick Simon 4-2, Burton Sintjago 3-2 cu dos careda anota mas 1 rbi y Alvaro Rodriguez di 3-1.
Henk Arnold ta bay ful e ruta pa seya e victoria riba su nomber enfrentando 30 bateador lansando 26 bola, 66 strike pa un total di 92 pitch permitiendo 7 careda di cual 2 ta limpi tras di 7 imparable ponchando un total di 5 bateador y ta regala 1 base por bola. Glenrick Marchena ta bay 4 inning y resulta pitcher perdedor tirando 27 bola, 37 strike bon pa 64 pitch permitiendo 4 careda tras di 5 hit y ta regala 3 base por bola.
Lorenzo Maduro ta drenta di relevo y ta tira un inning. Weganan ta continua dialuna, diaranson, diabierna na Pos Chikito y diamars y diahuebs na Dragon Hitters. Dragon Hitters conoci pa su pastechinan sabroso y un bar bon gestock. Tin 10 wega programa pa e siman entrante di 17 pa 21 di Juni. Wak pa Bo tey!!
