Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua na veldnan na Pos Chiquito. Den un tremendo partido White Joker a faha contra e equipo invicto Logros y e veteran Henk Arnold a bin por la goma lansando su mihor partido di temporada pa fucila Logros 3-2 kibrando asina nan invicto.
White Joker ta pika ariba den bom di promer inning cu 2 careda. Desde promer inning tanto Henk Arnold pero tambe Edgar Bautista a faha pa nan equipo y no a permiti careda mas. Den cabez di 6 inning Logros ta rally pa empata e wega 2-2 sinembargo White Joker no tab aha cabez y ta score 1 careda den bom di 6 cual a reulta e careda di victoria.
Pabien na ambos equipo. White Joker como equipo a bati di 24-8 pa un averahe di 333 mientras Logros a bay di 24-6 pa un averahe di 250. Boxscore final White Joker 3 careda, 8 hit, 1 error y ta laga 8 coredor na base. Logros 2 careda, 6 hit, 1 error y ta laga 4 coredor den circulacion. Mihor bateadornan pa White Joker ta Michael Rasmijn 3-2 cu 1 careda anota y 1 impuha, Derek de Castro 3-1 cu 1 rbi incuyendo un triple, Francis Silva 1-1, Yhoan Ruiz 2-1, Sandrick Wester y Rhajin Donata ambos di 3-1.
Pa Logros a destaca na plato Rachi Berry 3-3 cu dos doblete, Arturo Camacho y Elvin de la Cruz di 2-1 y Jurick Cicilia 3-1 cu 2 rbi. E veterano Henk Arnold still going strong ta enfrenta 24 bateador y bay 6 inning tirando 21 bola, 64 strike pa un total di 85 pitch permitiendo 2 careda tras di 6 hit ponchando 7 bateador sin regala base por bola pa un actuacion excelente poniendo e victoria riba su nomber. Edgar Bautista tambe por mira atras riba un bon actuacion pero mester conforma su mes cu e derota. Edgar ta enfrenta 28 bateador y ta bay 6 inning tirando 35 bola, 69 strike pa un total di 104 pitch permitiendo 3 careda tras di 8 imparable regalando 2 base por bola. Campeonato ta continua Dialuna, Diaranson y Diabierna awor riba veld di Pos Chiquito y Diamars y Diahuebs na Dragon Hitters. Un total di 10 wega programa pa e siman entrante. Jega tereno bin apoya Bo equipo prefer!!
