Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba veld di Dragon Hitters.
Den categoria A-Klas White Joker den su ultimo wega di campeonato regular tabata tin mester di un victoria pa clasifiva y cu un derota nan lo mester a hunga un wega extra di dekite vs Blackhawks pa mira ken lo clasifica na number 4. Pues miembronan di Blackhawks tabata na tereno observando e wega y resando pa White Joker por perde. 
White Joker sinembargo nan wega tabata contra The Prodigies. The Prodigies cu no a logra un victoria den 2019 y ta 0-9 ta enbuska di un alegria esta un victoria pa nan por celebra. White Joker ta sali piki careda den cabez di promer inning. The Prodigies ta score 1 careda den bom di promer y ta rally pa 7 careda den bom di 2 inning. The Prodigies tabata conecta Henk Arnold hopi facil y durisimo ta bolbe score 4 careda mas den bom di 3 inning pa bay ariba 12-7 unda tur cos ta mustra cu The Prodigies hungando bon riba e anochi aki lo bay celebra nan promer victoria. Manera nan ta bisa e bala ta rondo y de cabez di 5 inning White Joker no kier entrega a score 4 careda pa hasi e wega 12-11 cu dos our cu dos coredor na segunda y tercera ta sali un line drive pa rightfielder cu ta dal na glove di e fildeador y ta cay na tera unda dos careda mas ta bin aden pa asina White Joker bolter e score 13-12 y ta clasifica.
Alegria pa un y tristesa pa e otro pero asina depor te ta funciona. White Joker 13 careda, 7 hit, 3 error y ta laga 6 coredor na base. The Prodigies 12 careda, 14 hit, 2 error y ta laga 4 coredor den circulacion. Mihor bateadornan pa White Joker ta Rajiv Cornelio 2-1, Mario Kock, Jhoan Ruiz, Rhajin Donata tur di 3-1, Arsan Wester di 4-2 cu un cuadrangular mas 4 careda impuha, Dylan Geerman 1-1. Pa The Prodigies e batenan tabata super “hot” unda Gregory Franken a bay di 4-3 cu 3 careda anota mas un cuadrangular cu 3 rbi, Jean Carl Henriquez di 4-2 cu 2 doblete, Urvin Paesch di 4-2 cu 5 rbi, Edson den Boef di 4-2, Michael Alvarez di 2-2 , Albertico Croes y Rajiv Landaeta ambos di 3-1. Henk Arnold ta bay 5 inning enfrentando 31 bateador tirando 17 bola, 66 strike bon pa 83 lansamento permitiendo 12 careda di cual 6 ta limpi tras di 14 imparable pa asina seya e victoria riba su nomber.
Joshua Lucas kende ta drenta releva Hector Winterdal ta resulta pitcher perdedor enfrentando 26 bateador den 4 inning y 1 tercio, lansando 53 bola, 53 strike pa un total di 106 pitch permitiendo 7 careda di cual 3 ta limpi tras di 4 hit y ta regala 4 base por bola. Albertico Croes ta drenta pa saca e ultimo 2 outnan di wega. Cu e resultado aki The Prodigies ta caba 0-10, White Joker ta clasifica cu 5 gana y 5 perdi mientras Blackhawks ta keda elimina cu 4 victoria y 6 derota. Play Off lo ta “ON” dialuna awor pa 715pm riba veld na Pos Chiquito unda Black Joker lo enfrenta Logros y pa 9pm White Joker vs Piratas. Jega tereno bin apoya Bo equipo preferi.
