Wesley Kook: Selikor ta genera mas of menos 40 miyon florin pa aña na ingreso

196

E cobransa di servicio di sushi pa cas, ta gobierno ta cobr’e na cada ciudadano pa medio di e sistema di belasting. E ora ey gobierno tin e compromiso cu Selikor cu loke nan conveni na principio di aña, kico e servicio nan ta costa, gobierno ta paga Selikor un suma delanta.

A base di esey Selikor ta draai nan gastonan. Pero na fin di aña ta draai un cuenta final. Hopi biaha ta calcula cuanto e gastonan ta, pero segun tempo ta transcuri ta haci e limpiesa, duna servicio y ta haci e gastonan. Si dado momento locual cu a haya na voorschot, no a cubri completo locual cu a conveni, locual cu a duna na servicio, e ora ey alsnog tin e compromiso cu gobierno, cu Selikor ta haya e diferencia, segun managing director di e compania, Wesley Kook.

Apart di esey, segun Kook, Selikor tin relacion di cliente cu companianan. Pa companianan tin manera un relacion directo. Eynan si ta duna e servicio y nan mes ta cubri e gastonan ey directamente na Selikor.

Tur e omzet loke Selikor ta genera pa aña ta varia, pero ta mas of menos 40 y pico miyon florin pa aña.

Cumplimento

Gobierno mes ta cobra e cen for di e ciudadano, pero Selikor ta cobra gobierno. Esaki ta sali riba e recibo di tur luna di awa cu coriente. Aqualectra, e compania di utilidad, nan ta saca recibo di e casnan y Selikor ta considera cada unidad cu tin un meter di awa, un meter di coriente y e ta tal manera ekipa pa e tin un vivienda, e ora Selikor ta considera e unidad ey un unidad cu e ora ey tin cu haya su servicio pa recoge sushi, pero tambe tin e obligacion di paga e 20 florin pa medio di e recibo cu nan ta haya di awa y coriente, pero cu ta un ehercicio cu Aqualectra ta haci en combinacion cu departamento di finansas di gobierno, tal manera cu si e 20 florin no wordo paga, e ora ey bo ta haya e ora cu Landsontvanger toch ta acerca e debedo y cobr’e toch den forma di dwangheffing.

Recibo di awa/coriente

En berdad loke ta paga na 20 florin, ta un derecho cu bo tin. Sea cu bo a duna sushi si of no, bo tin derecho di haya e servicio. Pero bo tin un deber tambe di paga a base di belasting. Selikor no ta pega e dosnan aki na otro. Como compania ta duna su servicio y ta haci un apelacion y ta sali for di e punto di bista cu e ciudadano ta paga su obligacion cu e tin di e belasting.

E medionan cu tin den e sistema di belasting pa cobra debenan atrasa, ta eseynan ta drenta na vigor na momento cu no paga e 20 florin tambe. Esey ontvanger ta encarga cun’e.

Plan pa futuro

Tur hende ta busca manera pa deshaci di sushi na un forma sano. Ta pesey mes, pa algun aña Selikor ta purba toch, prome cu benta e sushi riba landfill, of procesa e sushi, ta trat’e di tal manera cu e ta tuma menos espacio posibel riba e tereno.

Pero apart di esey ta purba mas tanto posibel di reusa e materialnan tambe, di tal manera cu nan no mester wordo tapa cu tera.

Segun Kook, tin sushi di construccion, cu ta di un cantidad toch basta considerabel ta bin riba landfill y ta procesa esaki bek. E hospital nobo na Corsou, a produci hopi material, na momento cu tabata coba y traha e fundeshi. E mesun materialnan aki a tuma nan, a crushnan y hopi di e material ey te ainda ta tumando material pa nan  hinca den e proceso di construccion bek.

Selikor a haci hopi reciclamento. Asina ey evita pa tin un cantidad grandi di sushi pa procesa riba landfill.

E ta conta pa metal tambe. Tin un tempo caba ta tuma carcacha di auto bieu. Cualkier material cu ta contene metal, ta wordo gecrushed y exporta bek den exterior.

No tin gana pa haci mas tanto manera taira di auto of tin tambe hopi plastic den sushi. Glas tambe, pallet. Ta hopi material ta haciendo ehercisio pa mas y mas haci reciclahe y asina ey evita cu e landfill ta yena.

Ta keda si un isla chikito y e isla chikito hopi biaha ta limita den posibilidadnan pa una bes cu bo colecta e materialnan aki, pa toch usanan util y e exportacion di material afo ta caro.

Esey no ta cu tur material por haci’e. Ta haci’e cu metal, pasobra metal toch tin un prijs riba mercado cu bo ta saca e gastonan di exportacion bek. Pero materialnan manera glas, plastic, taira, etc. ainda no por haya un bon solucion. Esey ta ehercisionan cu ta keda haci si pa por haya opcion pa recicla mas tanto posibel y tin cu bisa cu ta haciendo tambe ehercisionan pa toch tin otro metodonan pa procesa e sushi y no landfill. Esey awendia berdad tin diferente tecnologia.

Un di nan kimamento di sushi, den incinerator. Cu e cayente cu e kimamento di sushi ta genera, por hasta genera coriente pa por usa di nobo. Tin diferente otro posibilidadnan manera compostering tambe cu por usa e fraccion organico di e sushi pa por forma compost y asina ey usa e material den agricultura. Esey ta un posibilidad cu den pasado Selikor a experimenta cun’e.