E organisacion di Aruba Little League ta sumamente orguyoso di anuncia cu Big League T’ey Bek! E categoria di Big League ta pa hungadonan entre 16 – 19 aña y ta e categoria cu na Aruba no a wak accion pa mas cu 3 aña caba.
Ta asina cu na augustus 2016, e organisacion internacional di Little League a restructura y a elimina e division di Big League, poniendo enfasis ariba e hungadonan di 4 (tee ball) te cu 16 aña (senior). E decision aki tabata basa ariba e margen di participacion den e categoria, esta 1% di e programa completo. A duna como indicacion tambe cu segun e tendencia, otro y mas oportunidad tabata presenta pa hungadonan di 17 y 18 aña.
Maske cu esaki lo por tabata e caso na Merca of otro region, caminda hungadonan por sigui High School of College Baseball, akinan na Aruba e falta di wega pa e categoria aki a crea un bashi enorme. Tene na cuenta cu tin hungado ta cuminsa den tee-ball na e edad di 4 aña y ta sigui te cu 16 aña, dedica na e deporte y pa net na e edad delicado aki mester stop pasobra no tin wega mas pa nan.
E vision di Aruba Little League ta pa lanta bek e categoria Big League ofreciendo e oportunidad pa hungadonan di edad 16 – 19 aña sigui hunga, desaroya y crece den e wega di baseball. Construyendo ariba un fundeshi di 12 aña dedicando na e deporte y pa kisas sigui nan soño di yega MLB y/of sigui cu un carera como student-athlete hungando baseball na un college na Merca.
“Nos no kier limita e oportunidadnan di nos muchanan y kier duna nan e chens pa “play ball”. E meta principal ta pa sigui engrandece baseball na Aruba, y pa por desaroya hungadonan pa sigui carga e amor y disciplina pa e deporte.”
Mester bisa cu a ricibi un acogida di biaha ora a drenta inscripcion di no menos cu 5 team di cual dos di North League (North Indians y Hammersharks), dos di Center League (Quality Chiropractic Grasshoppers y Stars Gillette) y un di South League (White Sharks). E entusiasmo di hungadonan, managernan, coachnan y umpirenan ta positivo y contagioso.
Weganan lo cuminsa e weekend di 17-18 april y lo sigui tur weekend te cu 20 di juni. Ademas lo tin un all star game estilo Major League ariba 29 di mei. E schedule completo ta obtenibel aki: https://scheduler.leaguelobster.com/846344/abl-aruba-big-league/2021/
Nos ta sumamente agradecido na Minister Dangui Oduber pa a kere den e vision y meta tras di e torneo aki y ta danki na su apoyo y contribucion, Big League por T’ey Bek!
Un danki tambe na Setar N.V. cu a percura no solamente pa e infrastructura pa nos partner principal, Power Sports Aruba por LiveStream e weganan pa 10 siman largo, pero cu su contribucion a duna espacio pa por tene tur wega na e veld di Crismo Angela / Nadi Croes (Winston). E meta di SETAR ta pa aporta den comunidad y esaki ta un manera cu ta aporta na deporte y hubentud.
Power Sports Aruba mirando e importancia pa carga y engrandece nos baseball na Aruba y tumando nota cu no ta permiti pa tin fanatico a tuma e reto di transmiti full e campeonato di Big League pa asina trece cada hugada di nos basebolistanan cerca nos fanaticonan di bon baseball innovando nos transmision pa asina trece e miho calidad posibel traves di nan FB Page Power Sports Aruba.
“Nos t’ey pa traha pa e muchanan y esey ta e motivacion principal tras di e esfuersonan aki.” Xiomajra Rafael y Jo-Anne Croes, competitie leiders di Big League a subraya. E programa di Little League tin como lema: caracter, curashi y lealtad y ta ofrece un cantidad grandi di experiencianan unico y beneficioso pa nos muchanan y nos comunidad.
