Peru ta manera un parha “Phoenix”, cu a nace for di shinishi den e ultimo dos añanan aki. Nan tabata e sorpresa no solamente pa clasificacion pa Mundial di Rusia 2018, apesar cu nan no a pasa fase di grupo, pero awo pa e final di Copa America. Diadomingo ta e dia cu tur Peruano, sea na Peru mes y na Aruba, ta pendiente pa nan seleccion cu lo enfrenta Brasil, cual, segun hopi, ta bay ta un partido “de infarto”.

Sandro Osorio a conta nos di e emocion grandi cu tin na momento cu e seleccion Peruano a pasa pa final di Copa America. Aunke cu nan ta leu di nan pais, nan a biba e emocion aki na un manera particular. E Peruanonan sa di e emocion y sensacion cu nan a sinti. Nan a bira loco, na momento cu Peru a gana Chile, pa final.

Segun Osorio, e coach cu nan tin awor aki, Ricardo Gareca, ta logrando hopi cos. Despues di mas di 37 aña, Peru a clasifica pa un Mundial. E ultimo tabata na Spaña ’82. Awo a logra pasa un final di Copa America, cual no a logra despues di 44 aña. Ultimo biaha cu Peru a hay’e tabata na 1975. Despues di asina tanto tempo, ta logrando e soño aki cu hopi emocion.

Peru y su rivalidad

Si pone enfasis entre Peru y Chile, nan tin un rivalidad pa e historia cu tin entre e dos paisnan aki, den e sentido di gueranan di antes. Semper ora Peru gana Chile ta un emocion totalmente diferente, ta manera cu nan ta gana cualkier otro ekipo manera Brasil of Colombia. Ta un nificacion totalmente distinto. Nan tambe ta hunga contra Peru cu nan miho team. E biaha aki Peru tabata superior na Chile y a anota e tres golnan pa cual e Peruanonan a grita cu henter nan alma!

Osorio a comenta cu e mes no a sinta. Tabata un wega “de infarto” cual nan a presencia den famia y amistad. Peru a sali di bon den esaki. E plan di wega cu Gareca a propone, a sali’e 10 punto. Peru a hunga asina bon, cu Osorio mes a keda asombra. E amantenan di futbol a sinti un emocion grandi. Hasta nan a yora pa cada gol. Nan a grita un mundo, cu nan a keda sin stem. Asina nan a biba e wega, cu hopi emocion!

Diadomingo t’e wega!

E expectativa, como Peruano, nan kier pa Peru gana. Nan kier e regalo ey! Pero nan lo enfrenta Brasil, cu no ta un ekipo con-cu-ta. Ta Brasil! Nan kier “laba nan cara” cu nan, dilanti e humiyacion cu Brasil a pone nan pasa, door di a gana nan 5-0. Pero esaki ta un revancha cu nan ta bay tin cu Brasil. Si Peru hunga e futbol cu nan a hunga contra Chile, definitivamente esaki lo bira un wega “de infarto.”

Comments

comments