La Fama Rincon di Boneiro ta na Aruba y ta bay hunga un wega amistoso contra di Dakota Starzz. Diabierna nan ta topa otro un biaha mas den un wega di revancha.
Gregory Lake, futbolista di Dakota Starzz, a bisa cu nan a gana e prome wega 3-1 of ta 3-2, pero La Fama Rincon a pidi un wega di revancha. E wega ta bay tuma luga na veld di Britannia, Centro Deportivo Franklin Bareño, pa 8:00 pm. Porta ta habri pa 7:00 pm y entrada ta 3 florin pa adulto y 1 florin pa mucha. E placa di entrada ta bay pa Casa Cuna.
Dave, e presidente di La Fama, a papia cu Lake y nan a pensa pa duna Casa Cuna e placa cu nan genera. E team di Dakota Starzz ta consisti dje team di Dakota di aña 1995, cu ta team di bario, amigo y ruman. E team ta consisti di Jair Oduber, Jonathan Lake, Omar Tromp, Juancho Geerman, y otro mas. Lake a bisa cu el a uni mas despues y awo e team ta consisti di algun cu a forma parti di seleccion, cu a hunga contra otro pa algun aña.
Lele Abraham, vocero di La Fama Rincon, a bisa cu e tin casi diesshete aña bibando aki y e ta gusta Aruba, pero awo ta su hendenan di Boneiro. Abraham a bisa di a combersa cu Dave cu a bin algun aña atras y awo nan ta bin bek. El a expresa despues di futbol e ambiente ta sigui na su cas.
Dave Molina di La Fama Rincon a indica cu diabierna Aruba por mira e team di Boneiro ta consisti di hungadonan di 35 y 40 aña. Un par di e hungadonan a yega di enfrenta Dakota na 2015 ora a recorda fondo pa Special Olympics di Aruba. Aunke cu nan a perde e wega 3-2, awo shete aña despues tin un otro team y otro wega. Nan ta bay percura pa haci e wega pa Dakota un poco dificil, pero mas importante ta pa logra e meta.
Lake, Molina y Abraham ta invita e amantenan di futbol, comunidad pa yega veld di Britannia pa disfruta e wega di futbol pero mas cu claro contribui na e meta pa recauda fondo pa Casa Cuna.
