“WEB ta experenciando un interupcion di coriente cu a afecta e area di hotelnan. Ta trahando pa remedia e problema. Ainda no por bisa cuanto esaki ta bay dura”, asina e relacionista publico di WEB Aruba NV, Asja Dongen, a conta nos mas trempan. “Entretanto e fayo a keda aresta y isola, a cuminsa cu e proceso di recuperacion y e areanan di hotel, Noord, Tanki Flip y vecindario tin coriente atrobe. Dentro di poco Santa Cruz y vencindario ta sigui”. Pero algun minuut pasa el a informa cu “Entretanto tur area tin coriente”.
Awe pa 3:30pm a presenta un fayo den e sistema di produccion di coriente na WEB Aruba NV cu a causa cu na dado momento no por a cumpli den entrega e demanda solicita pa NV Elmar. Consecuentemente NV Elmar mester a baha distribucion, lagando algun districto y barionan sin coriente. Por a tuma nota cu den 1 ora di tempo a reanuda suministro normal atrobe, aunke cu ainda no a soluciona e fayo internamente den WEB. Pero como cu por a isola e fayo, por a sigui cu produccion normal atrobe.
Como cu net awe tin varios eventonan sindical, mesora a crea e impresion of e percepcion cu e baymento di coriente lo por ta un accion sindical. Nos a compronde cu esaki no ta e caso.
