For di tempran WEB no por a suministra coriente na varios bario y te dialuna mainta por a restablece coriente finalmente.
Director di WEB, Luis Oduber a splica cu ayera tardi, rond di 5’or y 18, a experencia un storing den central. A inicia cu un boiler, FD fan a trip y na e momento ey a trece un desbalance den central. Operadornan a reacciona door di benta algun load afo, cual ta Elmar 1, 2, y 3, pa por stabilisa e produccion prome cu por a bay wak kico a sosode y purba di trece coriente bek.
Ora cu esaki a sosode, causa na e momento ey no tabata identifica. Conforme procedura mester identifica y isola e problema. na e momento ey, banda di 5’or y 18, ainda no a haya sa kico e problema y door cu inicialmente no tabata un blackout.A base di esey keda experencia un imbalanse den sistema y entre 5’or y 18 y 7’or y 10 a experencia e imbalanse y pa 7’or y 15 a bay den un blackout total. Ekiponan di WEB a bay down completamente y ta algun luz so a keda sendi den e central di WEB. Loke a haci ta wak unda tabata tin e fayo, pero na e momento ey no por a identifica nada.
A cuminsa cu un blackstart y pa 7’or y 57 a cuminsa suministra algun bario cu coriente. Den un caso asina no por cuminsa suministra barionan grandi. E sistema ta chikito y e motor tin cu cuminsa load suficiente pa despues aumenta pa di dos y di tres motor y ta aumenta e ora e suministro di coriente.
Prome e barionan di Santa Cruz y Pos Chikito a cuminsa haya e coriente mas tempran.
E prome biaha cu a restart, door di e mesun fayo, e sistema a keda toch den un imbalance y a bay den un blackout un biaha mas. Ora cu a identifica e fayo, a yama e tecniconan pa bin traha riba dje. A tuma e decision pa cuminsa cu e unidadnan chikito y e sistema mester ta robusto pa schakel in e kabelnan di distancia largo. Na momento cu schakel in, e ta causa un imbalance. Si e sistema di produccion no ta suficiente solido, e por bentabo abao atrobe.
A scoge pa start poco poco. Pa 4’or y 40 di marduga, a suminista coriente na henter comunidad. Procedura ta pa identifica semper pa start na un manera safe y confiabel. Esey ta e motibo pa scoge e momento ey pa start poco poco un motor cada rato y poco poco suministra e isla bek cu coriente.
Aparatonan di coriente
Naturalmente durante di un interupcion di coriente asina tin hende ta experencia cu algun ekipo electronico ta daña. Luis Oduber a splica cu den caso cu por a experencia cualkier parato cu a daña, tuma contacto cu Elmar. Elmar ta e compania di distribucion. Nan lo atende cu e cliente y eventualmente WEB mester vergoed nan si keda demostra cu e tabata a base di e fayo. Tin un formulario cu tin cu yena na Elmar pa tipo di eventualidad asina.
