Asja Dongen, Vocero di WEB a comunica cu redaccion di 24ora.com cu e produccion di coriente na WEB a alcansa e 30% pa algo pasa di 10 or di anochi. Poco poco ta lanta e planta completo di WEB. Unda e fayo ta, no a bin sali na cla ainda. E perspectiva ta pa cu prome di 12 AM e situacion lo a normalisa bek.
Ta den man di N.V. Elmar pa percura e distribucion. Durante anochi di blackout mas trempan algun bario a haya coriente y despues coriente a bay bek.
Algun lugar manera Aeropuerto Internacional Reina Beatrix a opera riba generator, esaki a cende e facilidadnan mas primordial algun minuut despues di e blackout.
Comercio a logra keda draai sin problema pero solamente esnan cu tabatin generator, na Alhambra restaurantnan a haya bishita inespera. Hopi tabata e clientela cu a para den rij pa un bon rato.
Den Oranjestad algo pasa di 8 or di anochi coriente a bin bek pero despues a bolbe bay. Barionan cu a haya coriente pasa di 10 or di anochi tabata den area di Pos Chikito, Sta Cruz, Savaneta, Piedra Plaat y algun area den Oranjestad West.
