Diasabra dia 7 di september ultimo, diferente bario di nos isla a keda sin coriente. Esaki tawata debi na un fayo den planta di produccion di WEB Aruba. E interupcion den produccion di coriente a sosode al rededor di 3 or di merdia y a dura te mas o menos 9 or y mey anochi. Investigacion preliminar ta mustra cu a surgi un fayo den instrumentacion di control critico di un boiler. E interupcion a surgi merdia, na momento piek di demanda di coriente door di comunidad, principalmente den e temporada aki.
Tawata mustra cu lo a recupera suministro di coriente dentro di un ora. Sinembargo banda di 5 or y mey a surgi un otro storing, e biaha aki den e sistema di cooling di turbina di gas. E areanan afecta pa e brown out a cubri gran parti di nos isla, entre otro Noord y vecindario, Santa Cruz y vecindario, Savaneta, Pos Chiquito y vecindario.
Na momento cu un fayo tuma luga, den e caso aki na un boiler, ta investiga unda e fayo a tuma lugar y despues ta bay over na isola y of coregi e problema. Unabes cu isola e problema, poco poco ta inicia e proceso di recuperacion di generacion di coriente. E proceso ta tuma su tempo y mester wordo trata cu hopi cautela pa preveni mas disturbio.
WEB tin di haber cu ekiponan di vapor bieu, esta boiler y generadornan, cual den curso di otro aña lo keda reeemplaza cu un planta nobo esta, RECIP IV. E motornan RECIP ta hopi mas flexibel pa opera. Cu RECIP IV e confiabilidad di produccion di coriente continuo lo mehora consirablemente.
Durante e proceso di recuperacion di suministro di coriente, comunidad di Aruba por a mantene nan mes na altura pa medio di updates riba e pagina di Facebook di WEB Aruba. WEB ta ofrece su disculpa pa e inconveniencia causa y ta gradici pueblo pa su comprension. Alabes WEB ta gradici tecniconan di WEB y ELMAR pa e bon cooperacion pa recupera e suministro mas liher posibel bou di e circunstancianan di diasabra ultimo.
