Riba Diasabra 3 di November, cuminsando pa 7 PM di anochi, WE CULTURE ta presenta su actividad cultural/educacional di cada luna. E evento lo tuma luga na Mundis Health Café na San Nicolas. E tema ta den cuadro di e topiconan, Placa, Cultura y Ownership.
E anochi aki lo consisti di diferente lectura y presentacion di fragmento di film.
Docente y investigador cultural Gregory Richardson, lo enfoca riba e topico di GENTRIFICATION. E fenomeno di gentrification ta trata di un proceso di renobacion di areanan urbanico (ciudadnan) depremi door di entre otro un empuhe economico, infrastructural, cultural, artistico y gastronomico abase di inversión di placa, conocemento y recursonan di afo. E orador lo trata e diferente perspectiva di wak e desaroyo aki, sea negativo of positivo. Lo mustra dos fragmento di film cu ta trata e fenomino aki na Brooklyn New York y na Brixton London. Lo haci comparacionnan cu e area di San Nicolas tambe.
E siguente parti di e anochi lo enfoca riba e funcionamento di placa. Lo mustra un parti di e documentario THE HIDDEN SECRETS OF MONEY produci door di Mike Maloney. E documentario aki ta trata e diferencia entre placa y ‘currency’ y con esaki ta duna forma na e economia global. E documentario aki ta interesenta den sentido cu e ta simplifica con placa ta traha.
Lo finalisa e anochi cu un presentacion cortico di sr Lourenço Teixeira cu lo duna un presentacion riba Exp Asset dentro e sistema monitario Crypto Currency.
Despues di e presentacionnan tin amplio oportunidad pa combersa y haci pregunta tocante e topiconan presenta den un ceno ameno educativo.
WE CULTURE ta un iniciativa grassroots comunitario cu ta organisa eventenonan cultural/educativo tur luna. Esaki ta e di 17 edicion. E organisadornan ta Sonny Richardson, Celeste Richardson-Woodley, Angelo Richardson y demas sostenedornan.
Dia: Diasabra 3 di November 2018
Luga: MUNDIS HEALTH CAFÉ, San Nicolas
Orario: 7 PM – 9:30 PM
