Ayera y awe awasero a cay bastante y mesora a nota cu camindanan a yena y den algun caso a bay completamente bou di awa. Mayoria experto ta bisa cu ningun caminda ta traha pa wanta tanto awa sin problema, pues e por ta normal. Asina mes, specialmente riba e construccion di Watt Vos Boulevard cu ta nobo y no a ni habri ainda, a nota cu varios parti tabata bou awa.

E ta crea e impresion cu e arkitectonan cu a diseña y traha e caretera no a tene debido cuenta cu rooinan of ruta di awa despues di awasero. Consecuentemente a traha e caminda mucho abou, cu ta haci cu awa ta keda para y ta obstaculisa trafico. Riba e caminda specifico cu ta conecta e rotonde na altura di Acero y Cas Casuela pa e rotonde na Ponton banda di Wing Hung Restaurant a nota varios parti bou awa.

Watty Vos Boulevard no a pasa examen di awasero

Watty Vos Boulevard no a pasa examen di awasero; Varios area, entre e rotonde di Cas Casuela y Wing Hung Restaurant, a keda bou awa. Bale la pena revisa e trabounan aki, prome cu habri e avenida nobo.

Posted by 24ora on Friday, October 11, 2019

Si e caminda aki tabata habri caba, lo tabatin problema pa autonan por a pasa normal riba e caminda grandi aki cu ta sali for di e rotonde dilanti Aeropuerto y ta bay te na Sun Plaza Mall. Esaki ta e caretera conoci como e “Ringweg 3” cu tabata planea desde aña 1976 caba, na momento di defunto Watty Vos tabata diputado di Obranan Publico bou gobernacion di MEP.

Mester bisa cu e plannan a keda warda pa por lo menos 10 aña, ora cu AVP a drenta gobierno na aña 1986, ora cu AVP a drenta gobernacion bek. Aunke cu Charro Kelly tabata Minister di Obranan Publico, a warda ora el a sali for di Gobierno pa por a sigui cu e plannan pa cumpra tereno, etc. Na aña 1994, cu Watty Vos como Minister di Obranan Publico a bolbe sigui cu e plannan. Di tal forma cu na aña 2010, bou Gabinete Mike Eman I a pone e plannan aki riba papel, a haci’e un proyecto PPP, a busca financiamento y a start cu e proyecto ambicioso aki.

Awor cu Mota Engil ta kedando cla cu e trabounan, ta nota cu tin varios aspecto cu merece un revision of evaluacion. Na e rotondenan specialmente ta nota concentracion di awa, despues di awasero. A haci algun cambio, specialmente na Cumana, pero cu e awasero e ultimo dos dianan aki, a nota cu tin mas caminda cu mester un miho evaluacion.

Tocante Watty Vos Boulevard

E proyecto, cu a inicia na aña 2014, ta parti den tres fase. E prome ta Waty Vos Boulevard for di rotonde di Aeropuerto pa e rotonde di Sun Plaza Mall. E di dos fase ta caya Ernesto Petronia y di tres ta Juancho Irausquin Bouelvard y L.G. Smith Boulevard banda di hotelnan. Na tur e ta mas di 15 kilometer di fietspad, 17 kilometer pa walkway, mas di 1500 mata riba henter e proyecto. E construccion a dura mas cu 2 aña, ta renoba 14.5 kilometer di caretera existente, traha 13 rotonde nobo, traha 2 overpass y mas. E contract ta dura mas o menos 22 aña, incluyendo construccion y ta costa alrededor di 200 miyon florin. Gobierno a cera un contract cu e compania Mota Engil pa “Design, Build, Finance & Mantain” di henter e proyecto pa 20 aña largo.

Comments

comments