Wardacosta a gara boto cu 350 kilo di cocaina cerca di Corsou

919

E barco di Marina Real, cu na e momentonan aki ta nabega pa Wardacosta den Caribe, a intercepta un boto tipo go-fast dialuna ultimo dia 1 di juni 2020 cu 10 pakete di droga abordo. A sigui e go-fast pa un tempo largo riba lama despues cu radarnan a señal’e. A persigui’e y a logra para e boto cu su tripulantenan.

Detecta
E avion Dash-8 cu asistencia di e radarnan di Wardacosta den Caribe a detecta y sigui e contacto sospechoso riba lama den cercania di Corsou. Riba potretnan cu e avion Dash a saca for di halto por a mira diferente bari di combustibel abordo di e go-fast, cu a duna indicacion cu por ta transporte di contrabanda. E barco Zeeland a persigui e go-fast y na momento cu a yega den cercania di dje, a lansa su botonan FRISC pa intercepta e go-fast. Durante di e persecucion durante oranan di anochi, e avion Dash a duna Zeeland asistencia pa localisa e go-fast mas pronto posibel. E cantidad di droga haya abordo ta aproximadamente 350 kilo di cocaina. A entrega e dos sospechosonan di sexo masculino, e droga y otro pruebanan na autoridadnan na Corsou pa por sigui cu investigacion den e caso.

Exitoso
Comandante di Zr. Ms. Zeeland, capitan-luitenant Paul Bijleveld, ta satisfecho cu e interseptacion. E tin gran admiracion tambe pa con e colaboracion entre tur e instancianan cu a traha hunto den e caso a cana. ‘E accion aki tabata exitoso, e avion Dash di Wardacosta a demostra atrobe su balor agrega. Tur e diferente partnernan a traha duro y coordina e trabou como un team cu tur e unidadnan di Wardacosta’. ‘Henter e team abordo di Zeeland ta satisfecho cu nan por a demostra cu den e crisis di COVID-19 tambe nan por tin
exito den e trabounan cu nan a bini p’e den Caribe; un di e trabounan banda di proteha y vigila e costanan ta e operacionnan di ‘counter-drugs’ den Caribe’.

Barco di Marina Real
Zr. Ms. Zeeland ta un ‘Oceangoing Patrol Vessel’ di Marina Real. For di april 2020 e barco ta activo den Caribe. E barco di Marina Real ta duna asistencia den operacionnan di droga y yudansa humanitario. Banda di e trabounan aki e barco ta eherce tareanan pa Wardacosta den lamanan Caribe manera entre otro, detecta pesca ilegal, delitonan den e medio ambiente maritimo y yudansa den trabounan di buskeda y rescate. Pa por eherce e tareanan aki e barco di Marina Real tin dos FRISC abordo y un helicopter NH-90. E barco Zr. Ms. Karel Doorman, cu
ta un barco di transporte di Marina tambe ta den Caribe. Karel Doorman tabata parti di e accion na momento cu e tabata ‘stanby’ den caso cu e mester a duna asistencia den forma di transporte medico cu e helicopternan Cougar cu tin abordo.